Argentina millisinin qələbə üçün 9 BATİL İNANCI

Dünya Çempionatının finalı ərəfəsində Argentina millisinin azarkeşləri, futbolçuları və məşqçiləri uğur gətirdiyinə inandıqları batil inanclara sadiqlik nümayiş etdirirlər.

Bizim.Media “savashmedia.az”a istinadla xəbər verir ki, ölkədə bu cür uğur gətirdiyinə inanılan ənənələr "kabalas" adlanır.

Beləliklə, argentinalıların futbolla bağlı ən məşhur batil inanclarını təqdim edirik:

1. Rəqib futbolçuların adının yazıldığı kağızı soyuducuya qoyurlar

Ən məşhur ritual rəqib komandanın ulduz futbolçularının adını kağıza yazıb soyuducunun dondurucusuna qoymaqdır. Azarkeşlər bu yolla rəqib oyunçuların meydanda "donacağına" inanırlar.

2. Uğurlu formanı yumurlar

Bir çox azarkeş turnir ərzində qalib gəldikləri oyunda geyindikləri formanı yumadan növbəti matçlarda da geyinirlər. Onlar hesab edirlər ki, formanın yuyulması uğurun itirilməsinə səbəb ola bilər.

3. Hər oyunu eyni yerdə izləyirlər

Argentinalılar qələbə qazandıqları oyunu harada izləyiblərsə, növbəti matçlarda da eyni məkanı seçirlər. Bəziləri hətta divanda oturduğu yeri belə dəyişmir.

4. Oyuna eyni insanlarla baxırlar

Azarkeşlər hesab edirlər ki, qalib gəldikləri oyunda yanlarında olan insanlar uğur gətirib. Buna görə də növbəti görüşləri də eyni dostlar və ailə üzvləri ilə izləməyə çalışırlar.

5. Eyni yeməyi yeyirlər

Qələbə qazandıqları matç günü nə yeyiblərsə, növbəti oyunlarda da eyni yeməyi seçənlər çoxdur. Onların fikrincə, bu, uğurun davamına vəsilə olur.

6. 1986-cı ilin formasını geyinirlər

Dieqo Maradonanın rəhbərliyi ilə qazanılan 1986-cı il dünya çempionluğu Argentinada xüsusi simvol hesab olunur. Buna görə də bir çox azarkeş həmin dövrün formasını geyinir.

7. Tünd-göy formanı uğur rəmzi sayırlar

Argentina millisinin tünd-göy ehtiyat forması da azarkeşlər arasında uğurlu hesab olunur. Bu forma xüsusilə İngiltərəyə qarşı tarixi qələbələrlə əlaqələndirilir.

8. Lionel Skaloninin öz ritualı var

Millinin baş məşqçisi Lionel Skaloni hər oyundan əvvəl meydana sağ ayağı ilə daxil olur və xaç vurur. O, bu ritualı uzun illərdir dəyişmir.

9. Prezident finala getmir

Argentina Prezidenti Xavyer Miley də batil inanclara sadiqdir. O bildirib ki, komandanın əvvəlki oyunlarını haradan izləyibsə, finalı da eyni yerdən izləyəcək. Prezident uğurlu seriyanı pozmamaq üçün stadiona getməyəcəyini açıqlayıb. Bundan başqa, onun hər oyunda eyni gödəkçəni geyindiyi bildirilir.

Futbolda nəticəni meydandakı oyun müəyyən etsə də, Argentinada milyonlarla azarkeş üçün bu batil inanclar final həyəcanının ayrılmaz hissəsi hesab olunur.

Bizim.Media