ABŞ prezidenti Barak Obamanın əmisi 69 yaşlı Onyanqo Obama ABŞ-dan deportasiya olunmamaq üçün qaçıb. ANS PRESS-in Rusiya mətbuatına istinadən verdiyi məlumata görə, məhkəmə Keniya sakini olan Onyanqo Obamanın 1992-ci ildə ölkədən deportasiya olunması barədə qərar çıxarmasına baxmayaraq, o ölkəni tərk etməyib. Daha sonra Boston Mühacirət Məhkəməsi Barak Obamanın əmisinin ölkədə qalması üçün sənəd almasının vacibliyi barədə qərar qəbul edib.
Məhkəmədə bildirilib ki, Onyanqo Obama 50 ildir ölkədə qeyri-qanuni miqrant həyatı sürüb və bütün vergiləri də ödəyib. Hakim qarşında çıxış edərkən Barak Obanın əmisi ailəsi barədə bunları deyib: "Mənim bir qardaşımoğlu var, adı Barak Obamadır. O, ABŞ-ın prezidentidir".
Qeyd edək ki, əmi Obama 1960-cı illərdən ABŞ-da yaşayır. 2011-ci ildə isə Onyanqo Obama Boston şəhərinin yaxınlığında avtomobildə sərxoş vəziyyətdə yaxalanıb.
