Vəkilin sözlərinə görə, görüş növbəti istintaq hərəkəti zəminində baş tutub. İstintaq sirri daşıdığı üçün vəkil istintaq hərəkətinin predmeti barədə məlumat verməsə də, P.Həşimlinin səhhətinin ağır olması və saxlanma şəraitindən şikayətləndiyini dedi: “Noyabrın 25-də axşam ombudsman Elmira Süleymanova və Ombudsman Aparatının əməkdaşları Pərviz Həşimovla görüşüblər. Bildiyiniz kimi, Pərviz aclıq aksiyasına başlamışdı. Amma ombudsmanın xahişi və səhhətinə görə Pərviz Həşimov aclığı dayandırıb. Onun səhhəti yaxşı deyil və səhhətinin pisləşməsinə də məhz saxlanma şəraiti çox pis təsir edir”.
Qeyd edək ki, dünən ombudsmanın Milli Təhlükəsizlik Nazirliyinin Müvəqqəti Saxlama Yeri və İstintaq Təcridxanasına növbəti planlı baxış keçirməsi barədə məlumat yayıldı. Bu barədə Ombudsman Aparatının rəsmi internet səhifəsində məlumat verilir. Məlumata görə, başçəkmədə məqsəd orada saxlanılan şəxslərlə görüşmək, saxlanılma şəraiti və vəziyyəti araşdırmaq olub. Təcridxanada saxlanılan şəxslərlə təkbətək görüş zamanı saxlanma şəraiti ilə bağlı şikayət daxil olmayıb. Müəssisənin tibbi təminat məsələləri araşdırılan zaman tibbi sanitar otağının müasir tibbi avadanlıqla təchiz edildiyi, lazımi dərman preparatları ilə təmin olunduğu, həkimin 24 saat fəaliyyət göstərdiyi müəyyən edilib. Saxlanılan şəxslər qanunvericiliyə uyğun olaraq, gün ərzində 3 dəfə keyfiyyətli qida və 2 saat gəzinti ilə təmin olunduqları məlum olub.
Məlumatda o da bildirilir ki, görüşdən sonra başçəkmənin nəticələrini və P.Həşimlinin qaldırdığı məsələləri milli təhlükəsizlik naziri, İstintaq Baş İdarəsinin rəisi və MSY və İT-nin rəisi ilə ayrı-ayrılıqda müzakirə edib, bəzi məsələlərin müsbət həlli razılaşdırılıb. Amma “müsbət həllini” tapmış məsələlər barədə heç bir məlumat verilmir.
Vəkil, E.Sadıqov isə Ombudsman Aparatının məlumatının həqiqəti əks etdirmədiyini bildirdi: “Pərviz Həşimov saxlanma şəraitindən necə razı ola bilər? O saxlanma şəraiti ilə bağlı məhkəməyə şikayət edib və saxlanma şəraitinin pis olmasını bütün protokollarda da qeyd edir. Əgər ombudsman orada vəziyyətin belə yaxşı olduğunu düşünürsə, MTN-dən xahiş edib bir kamera alıb orada iki gün qala bilər”.
Eyni zamanda vəkil “müsbət həllini” tapmış məsələlər barədə də bir bilgiyə malik olmadığını dedi. O, P.Həşimlinin saxlanma şəraitinin dəyişmədiyini, ailə üzvləri ilə ona görüş verimədiyini, hətta ona zəng etməyə belə imkan yaradılmadığını dedi.
Belə ki, adətən MTN təcridxanasından çıxarkən təzyiqə məruz qalan vəkili bu dəfə bir saat yarım gözləməyə məcbur ediblər: “Bu dəfə də mənimlə müdafiə etdiyim şəxs arasında olan yazışmalar və mənim apardığım qeydlər əlimdən alındı. Qanunsuz olaraq məni içəridə də saat yarım saxladılar. Artıq saat yeddiyə işləyəndə dedilər ki, hə, buraxın bunu, qoy getsin. Bu, kobud qanun pozuntusudur. Bu məsələ ilə bağlı müvafiq şikayətlərim olacaq”.
