Milli Şuranın son sesssiyasında keçmiş ADP və ACP sədri, eks-millət vəkili Akif Şahbazovun üzvlükdən çıxarılmasına səbəbkarın özü dərhal (25 oktyabr 12.09 radələrində) Moderator.az-a açıqlamasında sərt münasibət bildirərək onun nə bu qurumun üzvlüyünə daxil edilməsindən, nə də çıxarılmasından xəbəri olmadığını bildirmişdi. Akif Şahbazov Milli Şura üzvlərinin qarasınca deyinərək adını ora yazarkən kimsənin ondan nəsə soruşmağı lazım bilməməsinə bərk qəzəblənsə də sonradan buna əhəmiyyət verməməyi lazım bildiyini deyib.
Moderator.az Milli Şura rəhbərliyinə
daxil olan bəzi səlahiyyətli şəxslərlə əlaqə saxlayaraq Akif Şahbazovun bu
quruma üzvlüyünün hansı mexanizm və
ya posedurla gerçəkləşdiyini araşdırıb. Bəlli olub ki, onun, keçmiş
deputatlar Zəminə Dünyamalıyevanın və Solmaz Ələsgərovanın
namizədliklərini Rəsul Quliyev Milli Şura üzvlüyünə təqdim edib. Özü də onlara o qədər
etibar edib ki, heç mövqelərini
öyrənməyi də lazım bilməyib. Bu isə Akif Şahbazova bərk təsir
etsə də o susmağa üstünlük verib.
Biz Rəsul Quliyevlə əlaqə saxlayıb onun məsələyə münasibətini öyrənmək istəsək də eks-spikeri tapa bilmədik. Hər
halda yaxın vaxtlarda onun da mövqeyini öyrənməyə çalışacağıq.
