Bu həftə internetdə Açıq Cəmiyyət Partiyasının
liderləri Rəsul Quliyevlə Sülhəddin Əkbərin telefon danışığının səs yazısı
yayılıb. Adıçəkilən şəxslər internetdə yayılan variantda montaja yol
verildiyini bildirirlər. Amma bu, telefon söhbətinin dinləndiyini inkar etmir.
İctimai-siyasi şəxslərin telefon danışığını
dinləmək və yaymaq nə anlama gəlir? Bu hallara yol vermək nə dərəcədə qanunidir?
Moderator.az-ın “Media
forum” saytına istinadən verdiyi məlumata görə, sabiq xüsusi xidmət orqanı
əməkdaşı, politoloq Ərəstun Oruclu bu təşəbbüsün müxalifət daxilində ziddiyyət
yaratmaq məqsədi güddüyünü bildirib: “Adi həyatda olduğu kimi siyasətdə də
bəzən insanlar onlara ən yaxın olanlar haqqında neqativ fikirlər
səsləndirirlər. Siyasətdə bu ənənə daha geniş yayılıb. Sadəcə belə söhbətlərin
çılpaqlığı ilə müzakirəyə çıxarılması əslində müxalifət daxilində mövcud
ziddiyyətlərə əlavə rəng qatmaq istəyidir. Bunu kim edib, necə edib, birmənalı
fikir söyləmək çətindir. Çünki mobil telefonların, dinləyici qurğuların da
imkanları genişdir. Səs yazısı təsadüfən kiminsə əlinə də keçə bilər”.
Ərəstun Oruclunun fikrincə, gizli çəkilişlərin
gündəmə gəlməsi istənilən halda diqqəti dövlət təhlükəsizlik orqanlarına
yönəldir: “Ən pis tendensiya odur ki, ölkənin təhlükəsizliyinə məsul olan
qurumlar bu cür hadisələr fonunda gözdən düşür. Bu baxımdan belə hallar
dövlətin təhlükəsizliyi üçün təhdiddir.
Qanuni tərəfinə gəldikdə, telefon danışıqları
yalnız məhkəmənin razılığı ilə dinlənə bilər. Bu faktların ictimailəşməsi
yolverilməzdir. Birincisi, dinləməni və çəkilişi kimin apardığını müəyyən etmək
mümkün olmur. Məsələn, mobil rabitəni Azərbaycanda fəaliyyət göstərən istənilən
ölkənin səfirliyində qurğu quraşdırılmaqla dinləmək olar. Hətta ölkənin
xaricində belə şəbəkəyə qoşularaq eyni məqsəd həyata keçirilə bilər. İstənilən
halda vətəndaşların telefon danışıqları, gizli çəkilmiş görüntüləri mətbuata,
internetə çıxırsa, bu, dövlətin təhlükəsizliyinə təhdiddir, dövlət maraqlarına
ziddir. Bu o deməkdir ki, vətəndaşlarla dövlət arasında böyük bir şübhə uçurumu
yaranıb”.
