Maykl Ceksona qarşı yeni ittihamlar yenidən gündəmə gəlib.
Bizim.Media xəbər verir ki, “60 Minutes Australia” proqramında çıxış edən Kascio ailəsinin üzvləri illərlə müdafiə etdikləri pop ulduzun onlara qarşı cinsi zorakılıq etdiyini və psixoloji nəzarət altında saxladığını iddia ediblər.
Ailə hazırda Ceksonun mirası ilə bağlı məhkəmə iddiası qaldırıb və əvvəlki mövqeyini tam dəyişib.
Dominik Kascio bildirib ki, dünyanın ən böyük ulduzlarından biri səninlə dost olmaq istəyəndə insan asanlıqla manipulyasiyaya məruz qala bilər.
Ailənin sözlərinə görə, Cekson onlarla 1980-ci illərdə yaxınlaşıb, uşaqları hədiyyələr, səyahətlər və xüsusi diqqətlə əhatə edib. Onlar əvvəlcə müğənnini özlərini parklara və qapalı tədbirlərə aparan “mehriban dayı” kimi qəbul ediblər.
Eddi Kascio bildirib ki, Cekson onlara özünü ailələrinin bir parçası kimi hiss etdirib.
Lakin ailə indi iddia edir ki, bu obrazın arxasında illərlə davam edən manipulyasiya və zorakılıq sistemi dayanıb.
Kascio ailəsinin üzvləri Ceksonun onları özünə emosional baxımdan bağladığını, qorxu və “sevgi” vasitəsilə nəzarətdə saxladığını bildirirlər.
Ailənin bacısı Mari-Nikol da müğənninin onun şəxsi sərhədlərini pozduğunu iddia edib. Kiçik qardaş Aldo isə ilk zorakılıq hadisəsinin uşaq yaşlarında baş verdiyini bildirib.
Onların sözlərinə görə, Cekson bəzən spirtli içki və dərmanlardan istifadə edərək davranışlarına nəzarət etməyə çalışıb. Ailə həmçinin iddia edir ki, müğənni onlara polisə və valideynlərə “düzgün cavablar” verməyi öyrədib.
Kascio ailəsi bildirir ki, uzun illər Ceksonu müdafiə edib və ona qarşı ittihamları rədd ediblər. Lakin “Leaving Neverland” sənədli filmindən sonra mövqelərini dəyişiblər.
“Biz onun əsgərləri kimi proqramlaşdırılmışdıq”, - deyə Eddi Kascio bildirib.
Ailə indi məqsədlərinin digər mümkün zərərçəkənlərə dəstək olmaq olduğunu deyir.
“Sonda canavar biz yox, o idi”, - deyə Eddi qeyd edib.
Maykl Ceksonun mirasını təmsil edən şəxslər isə ittihamları rədd edirlər. Onlar bunu sənətçinin adından pul qazanmaq cəhdi kimi qiymətləndirirlər.
Hüquqşünaslar bildirirlər ki, Kascio ailəsi onilliklər ərzində Ceksonu dəstəkləyib və əvvəllər bu cür ittihamlarla çıxış etməyib.
Bizim.Media
