Türkiyə Prezidenti Rəcəb Tayyib Ərdoğan İran Prezidenti Məsud Pezeşkianla görüşüb.
Bizim.Media Anadolu agentliyinə istinadən xəbər verir ki, görüş Antalyada keçirilən BMT-nin İqlim Dəyişikliyi üzrə Çərçivə Konvensiyasının Tərəflər Konfransının (COP31) Liderlər Sammiti çərçivəsində baş tutub.
Görüşdə Türkiyə-İran münasibətləri, eləcə də regional və qlobal məsələlər müzakirə olunub.
Ərdoğan İranla ABŞ arasında qarşıdurmanın mümkün qədər tez başa çatmasını və davamlı sülhün təmin edilməsini arzuladığını bildirib. O, sabitliyin bərqərar olacağı yeni dövrün başlanması üçün diplomatiyaya şans verilməsinin vacibliyini vurğulayıb.
Türkiyə Prezidenti vaxt itirmədən danışıqlar masasının qurulmasının əhəmiyyətinə diqqət çəkib. O, Türkiyənin sülhə yönəlmiş səylərini regiondakı qardaş ölkələrlə birlikdə dəstəkləməyə davam edəcəyini qeyd edib.
Görüşdə Türkiyənin xarici işlər naziri Hakan Fidan, milli müdafiə naziri Yaşar Gülər, hakim Ədalət və İnkişaf Partiyasının (AK Parti) sədr müavini və sözçüsü Ömər Çelik, Milli Kəşfiyyat Təşkilatının rəhbəri İbrahim Kalın və digər rəsmi şəxslər də iştirak ediblər.
