2023-cü il sentyabrın 16-da Qrenlandiyanın şərqində böyük dağ yamacının uçması nəticəsində yaranan sunami doqquz gün ərzində hər 92 saniyədən bir təkrarlanan seysmik siqnal yaradıb.
Bizim.Media UNİAN-a istinadən xəbər verir ki, dağ süxurları və buzlaq kütləsi Dikson fiyorduna (dəniz və ya okean sularının quruya doğru daxil olduğu, sahilləri dik və hündür qayalıqlardan ibarət dar, uzun körfəz - red.) tökülərək suyu qarşı sahilə, 200 metrdən çox hündürlüyə qaldırıb. Fiyordun coğrafi quruluşu nəhəng dalğanın açıq okeana çıxmasına imkan verməyib. Nəticədə su kütləsi dar körfəzdə irəli-geri hərəkət edərək dayanmış dalğa (seyş) yaradıb.
Alimlər müəyyən ediblər ki, suyun qayalı sahillərə təkrar-təkrar çırpılması Yer qabığında aşağıtezlikli seysmik dalğalar yaradıb. Bu siqnallar dünyanın müxtəlif yerlərindəki seysmik stansiyalar tərəfindən qeydə alınıb.
Peyk radarlarından əldə edilən məlumatlar dalğanın amplitudasının 8 metr olduğunu təsdiqləyib. Tədqiqatçılar hadisənin əsas səbəbinin buzlaqların əriməsi və dağ yamaclarının sabitliyini itirməsi olduğunu bildirirlər.
Bizim.Media
