Saxta dərmanların ticarəti ilə məşğul olan beynəlxalq mütəşəkkil cinayətkar qrupun üzvü, Hindistan vətəndaşı Azərbaycandan deportasiya edilib və vətəninə çatdıqdan dərhal sonra həbs olunub.
Bizim.Media xəbər verir ki, Hindistan mətbuatının məlumatına görə, Praşant Rancan Babu bir müddət əvvəl vizasının müddəti bitdiyi üçün Azərbaycanda saxlanılmışdı. Daha sonra Hindistan rəsmiləri Azərbaycanlı həmkarlarına onun saxta dərman ticarətindəki iştirakı barədə ətraflı məlumat (dosye) təqdim ediblər. Deportasiya proseduru başladılıb və Babu bu səhər Dehliyə göndərilib, təyyarədən düşən kimi dərhal nəzarətə götürülüb.
İş üzrə araşdırma aparan xüsusi istintaq qrupu Praşantın saxta dərman istehsalı şəbəkəsində əsas fiqurlardan biri olduğundan şübhələnir. Müstəntiqlər əvvəlcə onun Azərbaycanda olduğunu müəyyən etmişdilər; məlumata görə, o, sentyabrın 9-da vizasının müddəti bitdikdən sonra saxlanılmışdı.
Cinayət sxemi səhiyyə idarəsinin əməkdaşlarının Ramanaqar ştatının Dodderi kəndi yaxınlığındakı bir təsərrüfata basqın etməsindən sonra üzə çıxıb. Aparılan əlavə araşdırmalar müxtəlif məkanlarda saxta dərmanların istehsalı və paylanması ilə məşğul olan daha geniş bir şəbəkəni aşkar edib.
Hindistanlı müstəntiqlər müəyyən ediblər ki, tərkibində Praşantın da olduğu mütəşəkkil qrup xərçəng əleyhinə dərmanların saxtalaşdırılması və satışı ilə məşğul olub. Qrupun illik dövriyyəsi milyonlarla dollar təşkil edib. İşlə əlaqədar Hindistanın bir neçə ştatında axtarışlar aparılıb və müstəntiqlərin həm ştatlararası, həm də beynəlxalq əlaqələrə işarə edən sübutlar əldə etdiyi bildirilir.
Bizim.Media
