Lahor polisi azərbaycanlı bir qadının qrup halında zorlanması iddiası ilə bağlı üç nəfərə qarşı cinayət işi açıb və onları həbs etmək üçün reydlər keçirir. Bu, Pakistanın Pəncab əyalətində son üç ay ərzində əcnəbi qadınların hədəf alındığı bu tipli ikinci hadisədir.
Bizim.Media xəbər verir ki, bu barədə urdu.alarabiya.net saytı yazıb.
İlkin polis hesabatına əsasən, 20 yaşlı azərbaycanlı qadın polisə bildirib ki, iki qadın onu naməlum bir kafeyə aparıb, daha sonra üç kişi onu gəzintiyə çıxarmaq bəhanəsi ilə bir mənzilə gətirib.
O danışıb ki, kişilər onu bir mənzilə apararaq içkisinə narkotik maddə qatıblar, növbə ilə ona təcavüz ediblər və nəhayət, şənbə günü günortadan sonra Lahordakı Ghazi yol qovşağının yaxınlığında onu qoyub gediblər. O, həmçinin iki mobil telefonunun əlindən alındığını bildirib.
İstintaqa rəhbərlik edən polis müfəttişinin müavini Seyid Zişan Raza “Arab News” nəşrinə açıqlamasında bildirib ki, polis qrup halında zorlamada iştirak edən şəxsləri müəyyən edib və cinayətdə istifadə edildiyi iddia olunan nəqliyyat vasitəsini aşkar edib:
"Biz bütün şübhəliləri müəyyən etmişik. Cinayətdə istifadə olunan nəqliyyat vasitəsi ələ keçirilib. Məlum olan bütün ünvanlarda reydlər keçirilib və əməliyyat fasiləsiz davam edir. Şübhəlilər tezliklə həbs olunacaqlar".
Rəsmi şəxs şübhəlilərin adlarını açıqlamaqdan imtina edib, lakin qeyd edib ki, "bu istintaq ən yüksək səviyyədə nəzarətdə saxlanılır". İlkin hesabata görə, təxminən iki həftə əvvəl iş məqsədilə Pakistana gəlmiş həmin qadın Ghazi yol qovşağı yaxınlığında qoyulub getdikdən sonra polisin qaynar xəttinə (15) zəng etmək üçün yoldan keçən birindən mobil telefon istəyib.
İş Pakistan Cinayət Məcəlləsinin qrup halında zorlama və zəhərləmə yolu ilə zərər vurma ilə bağlı olan 375-A və 337-J maddələri əsasında "Defence-C" polis bölməsində qeydə alınıb.
Oxşar bir hadisə bu ilin iyul ayında baş vermişdi; həmin vaxt polis Lahorun nüfuzlu "Defence" məhəlləsində iki əcnəbi qadını – biri Niderlanddan, digəri isə Venesueladan olan qadınları – xilas etmişdi. İddiaya görə, qadınlar dörd nəfər tərəfindən qaçırılıb və cinsi zorakılığa məruz qalıblar.
Həmin vaxt polis bildirmişdi ki, qadınlar Pakistana yerli bir tanışın dəvəti ilə gəliblər. İstintaqçılar müşahidə kameralarının görüntüləri vasitəsilə şübhəlilərin izinə düşüblər və qadınlar iki saat ərzində xilas ediliblər.
Bizim.Media
