Türkiyədə noyabrın 8-də bir sıra bölgələrdə qar yağacağı gözlənilir.
Bizim.Media xəbər verir ki, bu barədə Türkiyə Meteorologiya Baş İdarəsi məlumat yayıb.
Bildirilib ki, ölkənin Qara dəniz bölgəsinin qərb və şərq hissələrinin yüksək dağlıq ərazilərində, eləcə də Şərqi Anadolunun yüksək bölgələrində sulu qar və qar yağışı müşahidə olunacaq.
Meteorologiya Baş İdarəsi əlverişsiz hava şəraiti ilə əlaqədar 19 vilayət üçün sarı kodlu xəbərdarlıq yayıb. Xəbərdarlıq edilən ərazilər arasında Artvin, Bitlis, Diyarbəkir, Kastamonu, Muş, Siirt, Van, Batman, Bartın, Düzce, Bingöl, Bolu, Hakkari, Mardin, Rize, Sinop, Zonquldak, Şırnak və Karabük yer alıb.
Proqnoza əsasən, bəzi bölgələrdə yağıntıların intensiv olacağı, güclü küləyin sürətinin isə saatda 70 kilometrə çatacağı gözlənilir.
Güclü yağıntılarla əlaqədar sel, subasma, torpaq sürüşməsi, ildırım, nəqliyyatda problemlər, buzlanma və şaxta təhlükəsi barədə xəbərdarlıq edilib.
Meteorologiya və yerli qurumlar sakinləri əlverişsiz hava şəraitinə qarşı diqqətli və ehtiyatlı olmağa çağırıb.
Bizim.Media
