Rusiyadakı Azərbaycan səfirliyi Moskvada Zəfər Gününə həsr olunmuş təntənəli gecə təşkil edib.
Bizim.Media APA-ya istinadən xəbər verir ki, tədbirdə Rusiyanın siyasi və ictimai dairələrinin nümayəndələri, Moskvada akkreditə olunmuş bir sıra ölkələrin səfirləri, hərbi attaşelər və Azərbaycan diasporunun tanınmış nümayəndələri iştirak ediblər.
Qonaqlara İkinci Qarabağ müharibəsində Azərbaycanın qələbəsi haqqında film nümayiş etdirilib. Filmin nümayişindən sonra Azərbaycanın Rusiyadakı səfiri Rəhman Mustafayev qonaqlara müraciət edib.
Bildirib ki, Azərbaycan bayrağı 8 noyabr 2020-ci ildə Şuşa qalası üzərində qaldırılıb: "Xalqımız 32 il bu qələbəyə doğru gedib".
Səfir onilliklər ərzində işğal zamanı dağıdılmış şəhər və kəndləri, dağıdılmış mədəni abidələri və təhqir olunmuş ziyarətgahları xatırladıb.
R.Mustafayev Azərbaycanın ərazi bütövlüyünün bərpasından danışaraq qeyd edib ki, ATƏT-in Minsk Qrupu çərçivəsində danışıqlar münaqişənin dondurulmasına gətirib çıxarıb, BMT Təhlükəsizlik Şurasının qətnamələri isə illərdir müzakirə mövzusu olaraq qalıb.
“8 noyabrın ən vacib dərsi və əhəmiyyəti ondan ibarətdir ki, beynəlxalq hüquq prinsipləri avtomatik olaraq tətbiq olunmur. Onlar uğrunda mübarizə aparılmalıdır. Onlar yalnız milli liderin siyasi iradəsi, xalqla birliyi, güclü iqtisadiyyatı və ən əsası, bu prinsipləri həyata keçirə bilən müasir bir ordu ilə dəstəkləndikdə dəyərlidir”, - deyə səfir vurğulayıb.
R.Mustafayev 44 günlük müharibə zamanı Azərbaycanı dəstəkləyən ölkələrə təşəkkür edib: “Qələbə Gününü qeyd edərkən həlak olanların xatirəsini minnətdarlıqla yad edir və sağ qalanların cəsarətinə ehtiram göstəririk”.
Daha sonra səfir azad edilmiş ərazilərin bərpasından danışıb, orada üç beynəlxalq hava limanının, eləcə də yolların, körpülərin, tunellərin, yaşayış binalarının, məktəblərin və tibb müəssisələrinin tikildiyini qeyd edib.
Diplomat Qarabağda sosial obyektlərin tikintisini maliyyələşdirən Özbəkistan, Qazaxıstan, Qırğızıstan, Türkmənistan, Türkiyə və Rusiyanın Həştərxan vilayətinin töhfələrini qeyd edib.
Mustafayevin sözlərinə görə, bərpa işlərinə artıq təxminən 15 milyard dollar sərmayə qoyulub.2027-2030-cu illərdə bu məqsədlər üçün təxminən 8 milyard dollar vəsait ayrılması planlaşdırılır.
Səfir vurğulayıb ki, hazırda 90 mindən çox insan Qarabağ və Şərqi Zəngəzurun azad edilmiş rayonlarında yaşayır, işləyir və təhsil alır.
Diplomat bərpa işlərinin minaların təmizlənməsi ilə mümkün olduğunu bildirib: "Hazırda Qarabağın və qonşu rayonların mina ilə çirklənmiş ərazilərinin təxminən 26 faizi minalardan təmizlənib və bu iş davam edir"
Səfir Qarabağın azad edilməsinin əsas nəticələrindən biri kimi Azərbaycan və Ermənistan arasında münasibətlərin normallaşmasının başlanğıcını qeyd edib. O, tərəflərin 8 avqust 2025-ci ildə Vaşinqtonda sülh müqaviləsini parafladığını və sərhədlərin delimitasiyasına başlandığını xatırladıb.
R. Mustafayev Bakının mövqeyini açıqlayıb, bildirib ki, sülh müqaviləsinin imzalanması üçün Azərbaycana qarşı ərazi iddialarını ehtiva edən müddəalar Ermənistan Konstitusiyasından və qanunvericiliyindən çıxarılmalıdır.
Rusiya ilə münasibətlərdən danışan səfir vurğulayıb ki, 22 fevral 2022-ci il tarixli Müttəfiq Əməkdaşlıq Bəyannaməsi onların əsasını təşkil edir. Mustafayevin sözlərinə görə, 9 oktyabr 2025-ci ildə Düşənbədə Prezidentlər İlham Əliyev və Vladimir Putin arasında keçirilən görüş bu müttəfiqlik münasibətlərinin zamanın sınağından keçdiyini və ikitərəfli münasibətlərin normallaşması prosesinə başladığını nümayiş etdirib.
Diplomat bildirib ki, bu ilin ilk 10 ayında artıq 40-dan çox yüksək səviyyəli səfər həyata keçirilib ki, bu da ötən illə müqayisədə iki dəfə çoxdur. O, həmçinin qeyd edib ki, Azərbaycan Rusiyanın 75 regionu ilə ticarət və iqtisadi əlaqələr saxlayır.
Daha sonra Azərbaycanın Rusiyadakı hərbi attaşesi polkovnik Kənan Təhməzov çıxış edib. O, Qələbə Gününü .Azərbaycanın müasir tarixinin ən şanlı səhifələrindən biri adlandırıb və işğal illərində yüz minlərlə insanın doğma yurdlarından qaçmağa məcbur olduğunu xatırladıb.
Təhməzov Azərbaycanın müdafiəsini necə gücləndirdiyindən və ordusunun döyüş hazırlığını necə artırdığından danışıb. O, xüsusilə Azərbaycan Prezidenti və Ali Baş Komandan İlham Əliyevin rolunu vurğulayıb, onun güclü siyasi iradəsini, strateji vizyonunu və çətin hərbi və siyasi şəraitdə verdiyi qərarları qeyd edib. Polkovnikin sözlərinə görə, Vətən müharibəsi zamanı ölkə rəhbərliyinin səyləri, ordunun döyüş meydanındakı hərəkətləri və ümumxalq dəstəyi vahid bir məqsəd ətrafında birləşib.
Şuşanın azad edilməsindən danışan hərbi attaşe hərbçilərin cəsarətinin gələcək nəsillər üçün nümunə olduğunu qeyd edib.
Çıxışının sonunda K. Təhməzov dövlətlər arasında etimadın qurulmasında hərbi diplomatiyanın əhəmiyyətini vurğulayıb: "Ölkəmiz regionda davamlı sülhün, təhlükəsizliyin və sabitliyin möhkəmləndirilməsində maraqlıdır".
Çıxışlardan sonra bayram konserti təşkil edilin. Qonaqlar beynəlxalq müsabiqələr laureatları Səxavət Məmmədovun (tar), Camal Abdinzadənin (piano) və Aysun Mahmudzadənin (soprano) ifalarını dinləyiblər. Tədbir qala şam yeməyi ilə başa çatıb.
Bizim.Media
