Rusiya noyabrın 4-dən sonra Ukrayna məsələsinin həlli ilə bağlı üçtərəfli məsləhətləşmələri bərpa etməyə hazırdır. Bunu Rusiya prezidentinin köməkçisi Yuri Uşakov bildirib.
Bizim.Media xəbər verir ki, Kremlin nümayəndəsi Rusiyanın sentyabrın 18-dən 20-dək keçirilən Dövlət Dumasına seçkilərdən sonra danışıqları bərpa etməyə hazır olduğunu daha əvvəl də bəyan etdiyini xatırladıb.
Onun sözlərinə görə, həmin vaxt Ukrayna tərəfi əldə olunmuş razılaşmanı pozub.
“İndi növbəti son tarix noyabrın 4-dür — bizim böyük bayramımız. Bu tarixdən sonra danışıqları bərpa etməyə hazır olacağıq”, — deyə Uşakov “Vesti” informasiya proqramı üçün Pavel Zarubinə müsahibəsində bildirib.
Noyabrın 4-də Rusiyada Xalq Birliyi Günü qeyd olunur. Uşakov daha əvvəl üçtərəfli məsləhətləşmələr üçün mümkün məkan kimi Birləşmiş Ərəb Əmirliklərinin paytaxtı Əbu-Dabinin nəzərdən keçirildiyini də açıqlayıb.
Bundan əvvəl Rusiya prezidenti Vladimir Putin Ukrayna münaqişəsinin həlli ilə bağlı üçtərəfli formatda danışıqları bərpa etməyə hazır olduqlarını bildirmişdi. Onun sözlərinə görə, danışıqların məqsədi yekun sülh sazişləri əldə edildikdən sonra Rusiya və Ukrayna üçün təhlükəsizlik təminatlarını müzakirə etmək olmalıdır. Putin bu məsələyə baxılarkən bütövlükdə Avropanın təhlükəsizlik arxitekturası mövzusunun da müzakirə ediləcəyini vurğulayıb.
Bizim.Media
