Cinayətkar əlcək taxsa belə, hadisə yerində müstəntiqlərə onun izinə düşməyə kömək edəcək sübutlar qoya bilər.
Bizim.Media xəbər verir ki, əlcəyin hazırlandığı material mikrozərrəciklər buraxa, əlcəklərin özləri isə fərdi izlər saxlaya bilər.
Bu barədə Rusiya İstintaq Komitəsinin Moskva üzrə Baş İdarəsinin baş kriminalisti, böyük müstəntiq Kseniya Katkova RİA Novosti-yə bildirib.
Mütəxəssisin sözlərinə görə, barmaq izlərinin olmaması hələ cinayətkarın hadisə yerində olduğunu gizlədə bildiyi demək deyil. Ekspertiza aşkar edilmiş izləri konkret əlcəklə əlaqələndirə bilər. Bioloji materialın sonrakı tədqiqi isə onun sahibini müəyyənləşdirməyə kömək edə bilər.
“Əlcək həmişə hər hansı izlərin qalmasının qarşısını almır”, – deyə Katkova izah edib.
O vurğulayıb ki, müasir kriminalistikanın imkanları çoxdan barmaq izlərinin axtarışından kənara çıxıb. Müstəntiqlər şübhəlinin şəxsiyyətinin müəyyənləşdirilməsinə kömək edə biləcək ayaqqabı izlərini, DNT-ni və digər maddi sübutları araşdırırlar.
Rəqəmsal izlər də xüsusi rol oynayır. Ənənəvi tədqiqat üsulları ilə birlikdə onlar cinayətin başvermə şəraitini bərpa etməyə və hadisəyə aidiyyəti olan şəxslərin dairəsini müəyyənləşdirməyə imkan verir.
Daha əvvəl Life.ru 1995-ci ildə törədilmiş beş qətlin kriminalistlər tərəfindən əlaqələndirilməsinə qoparılmış xəz yaxalığın və ayaqqabı izlərinin necə kömək etməsi barədə yazıb. Cinayətlərdən birinin yerində aşkarlanan çay fincanındakı barmaq izi əlavə sübut olub. İstintaqın məlumatına görə, şübhəli başqalarının adlarından istifadə edib və hüquq-mühafizə orqanlarından gizlənib.
Bizim.Media
