ABŞ Prezidenti Donald Tramp Böyük Britaniyanın baş nazir Endi Bernemi (Andy Burnham) "çox xoşagələn oğlan" adlandırıb, baxmayaraq ki, onun liberal baxışlarından gileylənib.
Bizim.Media xəbər verir ki, "PA Media"nın məlumatına görə, Tramp bu barədə bazar günü İrlandiyaya səfəri zamanı jurnalistlərə bildirib.
Amerika liderindən Bernemin onun İrlandiyanın birləşdirilməsini dəstəkləyən açıqlamaları haqqında nə düşündüyünü soruşublar. Tramp cavab verib ki, britaniyalı baş nazirin bu məsələdə dəqiq nə dediyini bilmir, lakin onunla şəxsən ünsiyyətdə olduğunu qeyd edib.
"Mən onunla danışmışam. Düşünürəm ki, o, çox xoşagələn oğlandır. Təəssüf ki, o, liberal baxışlara meyllidir", – deyə ABŞ Prezidenti bildirib.
Tramp, həmçinin Bernemin Şimal dənizində neft və qaz hasilatının genişləndirilməsini təsdiqləmək niyyətində olduğunu bir daha iddia edib. Amerika prezidentinin sözlərinə görə, Britaniyanın baş nazir "həmin axmaq yel dəyirmanlarını dayandırmaq fikrindədir".
Trampın Bernem haqqında söylədiyi müsbət sözlər onun Kir Starmer barəsindəki əvvəlki açıqlamalarını xatırladır. Ötən ilin yanvarında, Ağ Evə qayıtdıqdan qısa müddət sonra Amerika prezidenti Starmerlə "çox yaxşı münasibətləri" olduğunu bildirmiş, siyasi fikir ayrılıqlarına baxmayaraq, onu yaxşı insan adlandırmışdı.
Sonradan iki lider arasında münasibətlər, o cümlədən İrana qarşı müharibə və Trampın Qrenlandiyanı ABŞ-a birləşdirmək istəyi səbəbindən yaranan fikir ayrılıqları fonunda mürəkkəbləşmişdi. Lakin hələ cari ilin iyun ayında ABŞ Prezidenti Starmerin ünvanına "çox xoşagələn insandır" və "bir növ dostdur" ifadələrini işlətmişdi.
Bizim.Media
