Ukraynanın insan hüquqları üzrə ombudsmanı Dmitri Lubinets Çerkassk vilayətində Zveniqorod Rayon Hərbi Komissarlığının əməkdaşları ilə bağlı son bir həftədə ən azı 7 insident qeydə alındığını bildirib.
Bizim.Media xəbər verir ki, hadisələrdən birində səfərbərlikdən möhləti olan kişi işə gedərkən saxlanılıb, qolları burularaq qandallanıb və evindən 140 kilometr uzağa aparılıb.
Kişinin sözlərinə görə, hərbi qeydiyyat və komplektləşdirmə mərkəzində ona silahla hədə-qorxu gəlib, fiziki güc tətbiq edilib və hərbi tibbi müayinədən keçməyə məcbur edilib. O, ombudsmanın nümayəndəsinin müdaxiləsindən sonra evinə qayıda bilib.
Lubinets həmçinin bildirib ki, bundan əvvəl həmin mərkəzə hərbi uçotdan tamamilə çıxarılmış başqa bir şəxsin də gətirilməsi ilə bağlı məlumat daxil olub.
Bizim.Media
