Moskvada internatda böyüyən Vera Kolesnikovanın 18 il ərzində Kursk vilayətində sənədsiz və faktiki olaraq pulsuz əmək şəraitində yaşadığı üzə çıxıb.
Bizim.Media xəbər verir ki, bu barədə “Kommersant” nəşri geniş araşdırma dərc edib.
1977-ci ildə Moskvada doğulan Vera Kolesnikovanın valideynləri valideynlik hüququndan məhrum edildikdən sonra o, demək olar ki, doğulduğu vaxtdan uşaq evində böyüyüb. Daha sonra psixonevroloji internata yerləşdirilib.
1995-ci ildən internatın tərbiyəçilərindən biri Veranı yay aylarında Kursk vilayətindəki kəndə aparmağa başlayıb. Vera 27 yaşına çatanda isə sənədlərə əsasən Moskva internatından Kursk vilayətindəki Şiqrov psixonevroloji internatına köçürülüb.
Lakin Veranın özü, qardaşı və hüquq müdafiəçiləri bildirirlər ki, qadın həmin internata heç vaxt daxil olmayıb.
O, kənddə keçmiş tərbiyəçinin bacısının evində yaşayıb, ailənin yaşlı üzvünə qulluq edib, bostanda işləyib, su daşıyıb və digər ağır təsərrüfat işlərini görüb.
“Əvvəl Tolstıy Kolodets kəndində yaşayırdım. Nənəyə qulluq edir, bostanı belləyirdim. Sonra nənə öldü, qızının yanına köçdüm. Bostan 25 sot idi, qarğıdalı da çox idi”, – Vera həmin illəri xatırlayarkən deyib.
Onun sözlərinə görə, qışda soyuq artırmada paltarını çıxarmadan yatmalı olub. Pasportu isə özündə deyil, “sahibə” adlandırdığı qadında saxlanılıb.
Vera pensiyasını da özü almadığını bildirib. Onun adına bank kartı açılıb və ödənişlərə həmin qadın nəzarət edib. Vera hər ay nə qədər pensiya aldığını belə bilmədiyini deyir.
2010-cu ildə “sahibə”nin qohumlarından biri Vera ilə evlənib. Qardaşı Sergey Kolesnikov hesab edir ki, bu nikah bacısının həmin ailənin yanında qalmasını və pulsuz işləməyə davam etməsini təmin etmək məqsədi daşıyıb. Cütlük 2015-ci ildə boşanıb.
Vera Kolesnikova 2004–2022-ci illərdə – ümumilikdə 18 il Kursk vilayətində yaşayıb. Onun sözlərinə görə, bütün bu müddət ərzində demək olar ki, həkimə aparılmayıb.
Hadisənin dönüş nöqtəsi 2022-ci ildə yaşanıb. Özü də həyatının böyük hissəsini internatlarda keçirmiş qardaşı Sergey müstəqil həyata başladıqdan və Moskvada mənzil aldıqdan sonra bacısını axtarmağa başlayıb.
Sergeyin müraciətlərindən sonra məsələ hüquq-mühafizə orqanlarının diqqətinə çatıb. 2022-ci ilin avqustunda Vera taksi ilə Moskva vilayətindəki “Russkaya Bereza” xeyriyyə fondunun sığınacağına göndərilib. Ona 40 min rubl, bank kartı və sənədləri verilib.
2022-ci ilin sentyabrından Vera xeyriyyə təşkilatının Mərhəmət Evində yaşayır. Burada ona oxumaq, yazmaq, smartfondan istifadə etmək və mağazada alış-veriş etmək kimi gündəlik bacarıqlar öyrədilib.
Hadisənin ən diqqətçəkən məqamlarından biri isə 2026-cı ilin iyulunda aparılan xətt ekspertizasının nəticələridir.
Ekspertlər 2003–2022-ci illərə aid 14 sənəddəki imzaları araşdırıblar.
Ekspertizaya əsasən, Veranın pasportundakı və 2003-cü ilə aid bəzi sənədlərdəki imzalar ona məxsus olsa da, 2004–2008-ci illərə aid bir sıra sənədlərdəki imzaları başqa şəxs atıb. 2017-ci ilə aid sənədlərdə isə daha bir şəxsin imzası müəyyən edilib.
Bunların arasında Veranın 2004-cü ildə Moskva internatından Kursk vilayətindəki internata köçürülməsi barədə ərizə, pensiya və bank hesabları ilə əlaqəli sənədlər də var.
Hüquq müdafiəçilərinin fikrincə, məhz bu sənədlər Veranın həyatının sonrakı 20 ilə yaxın dövrünü müəyyənləşdirib.
Vera hazırda Moskvada yetim kimi ona verilməli olduğunu bildirdiyi sosial mənzili almaq uğrunda da məhkəmə mübarizəsi aparır. Moskva hakimiyyəti onun 23 yaşına qədər mənzil üçün müraciət etmədiyini və sonradan başqa regiona köçərək Moskva qeydiyyatını itirdiyini əsas gətirərək müraciətini rədd edib.
Veranın vəkili isə bildirir ki, qadın internatda yaşadığı, təhsil imkanları məhdud olduğu və müstəqil hüquqi addımlar ata bilmədiyi üçün vaxtında öz hüquqlarını həyata keçirə bilməyib. Müdafiə tərəfinin təqdim etdiyi ekspertizaya görə, onun Kurska köçürülməsi üçün istifadə edilən ərizədəki imza da Veraya məxsus deyil.
İş üzrə kassasiya şikayətinə 13 avqust 2026-cı ildə İkinci Ümumi Yurisdiksiya Kassasiya Məhkəməsində baxılması nəzərdə tutulur.
Vera isə başına gələnlərə baxmayaraq, onu illərlə işlədən insanlara kin saxlamadığını deyir. İndi onun əsas arzusu Moskvada öz mənzilində yaşamaq və işləməkdir. (Musavat.com)
Bizim.Media
