Google süni intellekt bölməsində rəhbərliyi dəyişdi

Google və onun ana şirkəti “Alphabet” süni intellekt sahəsində rəhbərlik strukturunda dəyişikliklər edib.

Bizim.Media xəbər verir ki, “Google DeepMind”in baş direktoru Demis Hassabis gündəlik idarəetmədən çəkilərək “Alphabet”in baş elmi direktoru və “Google DeepMind”in sədri vəzifələrini tutacaq.

O, diqqətini süni ümumi intellektin (AGI) inkişafına, uzunmüddətli elmi tədqiqatlara və süni intellektin cəmiyyətə təsirlərinə yönəldəcək.

“Google DeepMind”in texnologiya üzrə rəhbəri Koray Kavukcuoğlu isə bölmənin operativ idarəçiliyini üzərinə götürəcək. O, süni intellekt modellərinin, o cümlədən Gemini ailəsinin inkişafına rəhbərlik edəcək. “Reuters” bu dəyişikliyi Google-un süni intellekt üzrə tədqiqat və məhsul fəaliyyətini daha sıx əlaqələndirmək, rəqibləri “OpenAI” və “Anthropic”lə rəqabətdə mövqeyini gücləndirmək cəhdi kimi qiymətləndirir.

Eyni zamanda, şirkətin baş elmi direktoru Jeff Dean 27 ildən sonra Google-dan ayrılaraq tanınmış AI tədqiqatçıları ilə birlikdə “Discovery Loop” adlı yeni süni intellekt şirkəti yaradır.

Reuters-in məlumatına görə, “Google”dakı bu dəyişikliklər süni intellekt sahəsində rəqabətin kəskinləşdiyi, Gemini modellərinin inkişafı ilə bağlı gecikmələrin müzakirə edildiyi və şirkətin süni intellektə böyük investisiyalarını artırdığı bir dövrə təsadüf edir. Xəbərin açıqlanmasından sonra “Alphabet”in səhmləri təxminən 4 faiz ucuzlaşıb.

Bizim.Media