Şoyqudan Makrona tövsiyə: “Daxili problemləri ilə məşğul olsun”

Avropanın Rusiya təhlükəsi bəhanəsi ilə hərbiləşdirilməsi Qərbə daxili problemlərdən və mənfi tendensiyalardan ictimaiyyətin diqqətini yayındırmaq üçün lazımdır.

Bizim.Media xəbər verir ki, bunu Rusiyanın Təhlükəsizlik Şurasının katibi Sergey Şoyqu bildirib.

“Bu, şübhəsiz ki, Avropa ölkələrində baş verənlərdən, Fransada, Almaniyada və Polşada müşahidə olunan mənfi tendensiyalardan diqqəti yayındırmaq üçün lazımdır”, – deyə o, MDB ölkələrinin təhlükəsizlik şuraları katiblərinin XIV illik görüşü çərçivəsində jurnalistlərə açıqlamasında Avropanın Rusiya təhlükəsi mifinin şişirdilməsi bəhanəsi ilə hərbiləşdirilməsi məsələsinə münasibət bildirərkən deyib.

Şoyqu xatırladıb ki, Rusiya Prezidenti Vladimir Putin dəfələrlə Rusiyanın nə Avropaya, nə də başqa bir ölkəyə hücum etmək niyyətində olmadığını vurğulayıb.

Bununla əlaqədar Rusiya Təhlükəsizlik Şurasının katibi Qərb liderlərinə, xüsusilə Fransa Prezidenti Emmanuel Makrona özünün rekord səviyyədə aşağı olan reytinqinə diqqət yetirməyi və təhsil sahəsi də daxil olmaqla, daxili problemlərin həlli ilə ciddi məşğul olmağı tövsiyə edib.

Şoyqu, həmçinin Ukraynaya yardım üçün vəsait ayırmaq əvəzinə, bu problemlərin həllinə diqqət yetirməyin vacibliyini vurğulayıb.

Onun sözlərinə görə, Qərb Ukraynanın əli ilə Rusiyaya qarşı mübarizə aparmaq üçün Kiyevə maliyyə dəstəyi göstərir.

Bizim.Media