“İki il boyunca o anı gözlədik” - “Şahzadə Mustafa”dan etiraf

Türk televiziya tarixində iz qoyan “Muhteşem Yüzyıl” serialında “Şahzadə Mustafa” obrazı ilə yadda qalan tanınmış aktyor Mehmet Günsür illər sonra hər kəsin yaddaşına həkk olunan məşhur edam səhnəsinin pərdəarxası məqamlarını açıqlayıb.

Bizim.Media xəbər verir ki, Fatih Altaylının “YouTube” kanalındakı “Pazar Sohbeti” proqramına qonaq olan aktyor iki il boyunca hazırlaşdıqları faciəvi səhnənin onda və bütün çəkiliş heyətində dərin izlər buraxdığını bildirib.

“Şahzadə Mustafa”nın tarixi aqibətinin əvvəldən bəlli olduğunu xatırladan Günsür bu gözləntinin yalnız ona aid olmadığını, bütün komandanın və milyonlarla tamaşaçının eyni anı yaşadığını vurğulayıb: “Bu, iki il boyunca təkcə mənim deyil, bütün komandanın və bütün izləyicilərin gözlədiyi şey idi. Bir atanın oğlunu öldürməsi çox böyük bir hadisədir. Səhnənin üzərimizə yüklədiyi fəlsəfi və emosional ağırlıq olduqca böyük idi. İki il həyat verdiyin bir obrazın ölümünü canlandırmaq, həqiqətən, çox çətin idi”.

Söhbət zamanı Fatih Altaylının “Şahzadə Mustafa”nın Bursadakı türbəsini ziyarət edib-etmədiyini soruşmasına Günsür maraqlı bir detalla cavab verib.

Edam bölümü yayımlanmazdan əvvəl türbəni ziyarət etməyi planlaşdırdığını, lakin bunun baş tutmadığını deyən aktyor həmin günlərdə yaşananları belə xatırladıb: “Həmin bölümün yayımlandığı günün səhəri Bursadakı türbəyə qeyri-adi dərəcədə böyük ziyarətçi axını oldu. Yaranan böyük izdiham səbəbindən türbə az qala ziyarətlərə bağlanmaq məcburiyyətində qaldı”. (qafqazinfo.az)

Bizim.Media