Argentinada qeyri-adi toy baş tutub. Ətraf mühiti fəalı olan Buenos-Ayres sakini Riçard Torres simvolik toy təşkil edərək, ağacla evlənib. Fəal qlobal ətraf mühiti mühafizə problemlərinə diqqət çəkmək üçün bu addımı atıb.

Buenos-Ayresin mərkəzi parklarından birində baş tutan toy mərasiminə "bəyi" dəstəkləyən dostları və yaxınları toplaşıb. Riçard Torres hətta yerli adət-ənənələrə görə, "gəlin" rolunda çıxış edən ağacı öpüb. "Mən bu toyla özünəməxsus şəkildə kiçik bir ismarıc göndərmək istədim ki, biz insanlar ana təbiətimizi xilas etmək üçün daha həssas olaq" - deyə, "bəy" Riçard Torres bildirib.

Əslən Perudan olan 33 yaşlı aktyor Riçard Torres Argentinada keçirdiyi ağacla simvolik toy mərasimini bütün Latın Amerikası ölkələrində təşkil etmək niyyətindədir.