Sentyabrın 4-də Almatı şəhərində fəaliyyət göstərən Qazaxıstan Respublikası Milli Mərkəzi Muzeyində görkəmli alim, xalçaçı-rəssam, Xalq rəssamı Lətif Kərimovun 120 illiyinə həsr olunmuş “Zamanın nəfəsi xalq sənətində” sərgisinin açılışı olub.
Bizim.Media xəbər verir ki, sərgidə Azərbaycan Milli Xalça Muzeyinin kolleksiyası əsasında hazırlanmış ekspozisiyada XIX–XX əsrlərə aid sənət nümunələri təqdim olunacaq.
Sərgi Azərbaycan Respublikası Mədəniyyət Nazirliyi, Qazaxıstan Respublikası Mədəniyyət Nazirliyi, Türk Mədəniyyəti və İrsi Fondu, Azərbaycan Milli Xalça Muzeyi və Qazaxıstan Respublikası Milli Mərkəzi Muzeyinin təşkilatçılığı ilə keçirilir.
Sərginin əsas hissəsini xalqımızın zəngin milli irsinin regional xüsusiyyətlərini və bədii müxtəlifliyini əks etdirən Quba, Bakı, Şirvan, Qarabağ, Qazax və Gəncə xalçaları təşkil edəcək. Ekspozisiyada “Pirəbədil”, “Qabıstan”, “Suraxanı”, “Faxralı”, “Salahlı”, “Xanlıq” və “Mir” xovlu xalçaları, həmçinin kilim, şəddə, vərni və zili kimi xovsuz xalçalar yer alıb.
Ekspozisiyanın xüsusi bölməsində Azərbaycan Milli Xalça Muzeyinin banisi Lətif Kərimovun müəllifi olduğu eskizlər, eləcə də “İkinci bahar” və “Xətai” xalçaları təqdim edilir.
Xalça sənətinin müxtəlif istiqamətlərini nümayiş etdirən sərgidə məfrəş, xurcun, çul kimi xalça məmulatları, eyni zamanda bədii tikmə, zərgərlik və bədii metal nümunələri, milli qadın geyimləri də yer alıb.
“Zamanın nəfəsi xalq sənətində” sərgisi Azərbaycanın zəngin mədəni irsi, xalq sənətinin çoxəsrlik ənənələri və tarixi inkişafı haqqında ziyarətçilərdə dolğun təsəvvür formalaşdıracaq.
Sərgi çərçivəsində Xalq rəssamı Lətif Kərimovun 120 illiyinə həsr olunmuş “Qazax və Azərbaycan xalqlarının dekorativ-tətbiqi sənəti: tarixi köklər, etnomədəni varislik və müasir inkişaf tendensiyaları” mövzusunda dəyirmi masa təşkil olunacaq.
Sərgi oktyabrın 4-dək davam edəcək.
Bizim.Media
