Ən böyük və ən tam qorunmuş nümunələrdən biri kimi tanınan Tiranozavr Reks skeleti "Sotheby's" hərracında rekord qiymətə – 50,1 milyon dollara satılıb.
Bizim.Media xəbər verir ki, "Sotheby's"in məlumatına görə, "Qus" adlandırılan bu nümunə 2024-cü ildə steqozavr üçün ödənilən təxminən 45 milyon dolları geridə qoyaraq, hərraca çıxarılan ən bahalı dinozavr fosili olub. Bundan əvvəl rekord 2020-ci ildə 32 milyon dollara satılan "Sten" adlı T-Reks skeletinə məxsus idi.
Fosilin yaşı təxminən 67 milyon ildir. Nümunə təxminən 61% nisbətində qorunub saxlanılıb, buna yaxşı vəziyyətdə olan kəllə sümüyü, iki ayaq və bir sıra nadir sümüklər daxildir. Skeletin hündürlüyü təxminən 3,8 metr, uzunluğu isə 11,5 metrdir. Fosil 2021-ci ildə Cənubi Dakotadakı bir rançoda aşkar edilib və ərazinin sahibi Qeri Likinqin şərəfinə adlandırılıb.
Telefon vasitəsilə iştirak edən və adının açıqlanmasını istəməyən hərrac qalibi on dəqiqəlik müzakirə prosesində altı rəqibini geridə qoyub. Hərrac başlamazdan əvvəl lotun dəyəri 20-30 milyon dollar qiymətləndirilirdi.
Onurğalılar Paleontologiyası Cəmiyyəti elmi əhəmiyyətini və tədqiqatçılar üçün əlçatanlığın təmin edilməsinin vacibliyini qeyd edərək, yeni sahibini nümunəni muzeyə bağışlamağa çağırıb. Daha əvvəl rekord qiymətə satılan "Apex" steqozavrı, "Syu" və "Sten" tiranozavrları ABŞ və BƏƏ-nin böyük muzeylərinə təhvil verilmişdi.
Bizim.Media
