ABŞ-ın Vitse-prezidenti Ceyms Devid (Cey Di) Vens İsrail rəhbərliyini və hökumət üzvlərini kəskin tənqid edərək rəsmi Tel-Əvivin artıq Vaşinqtonun "imtiyazlı və xüsusi müttəfiqi" statusuna arxayın ola bilməyəcəyinə dair unikal və sərt bəyanatla çıxış edib.
Bizim.Media xəbər verir ki, bu barədə məlumatı "Politico" nəşri və beynəlxalq agentliklər Ağ Evdə keçirilən mətbuat brifinqinə istinadən yayıb.
Vensin bu kəskin reaksiyası İsrail rəsmilərinin ABŞ ilə İran arasında imzalanmış müvəqqəti sülh sazişini (Anlaşma Memorandumu) kəskin tənqid etməsinə və Prezident Donald Trampa yönəlik ittihamlarına cavab olaraq səslənib.
"Dünyada sizə rəğbət bəsləyən yeganə lider Trampdır"
Vitse-prezident brifinq zamanı İsrail Kabinetinin üzvlərinə "ayılmağı və reallığı qəbul etməyi" tövsiyə edib:
"Mənim onlara mesajım iki hissədən ibarətdir. Birincisi, hazırda bütün dünyada İsrail dövlətinə rəğbət bəsləyən və onu dəstəkləyən yeganə dövlət başçısı Donald Trampdır. Əgər mən İsrail hökumətinin kabinetində təmsil olunsaydım, dünyada əlimdə qalan yeganə güclü müttəfiqə hücum etməkdən çəkinərdim".
Ağ Evdən hərbi yardımlar xatırlatması
Cey Di Vens, həmçinin İsrailin beynəlxalq müstəvidə ciddi şəkildə təcrid olunduğunu vurğulayıb və ölkənin ABŞ-dan hərbi asılılığını rəqəmlərlə xatırladıb. O bildirib ki, bu gün İsraili müdafiə edən hərbi sursat və müdafiə silahlarının üçdə ikisi məhz amerikalı fəhlələrin əli ilə hazırlanıb və ABŞ vergi ödəyicilərinin pulları hesabına maliyyələşdirilib.
Ekspertlərin fikrincə, Vensin bu çıxışı ABŞ-İsrail münasibətləri tarixində ən sərt rəsmi bəyanatlardan biridir və Tramp administrasiyasının regional sülh naminə artıq İsrailin hər bir etirazını "veto" kimi qəbul etməyəcəyinin bariz göstəricisidir.
Bizim.Media
