Onlar nüvə qışından, ölümcül pandemiyalardan və sivilizasiyanın süqutundan "beşulduzlu" rahatlıq içində xilas olmaq üçün Cənubi Dakotanın ucsuz-bucaqsız prerilərinə (çöllərinə) qaçmışdılar. Lakin "Yer üzündəki ən böyük sağqalma icması" statusuna iddialı olan elit "Vivos xPoint" sığınacağının sakinləri nəticədə Armageddondan daha qorxulu bir düşmənlə — bir-birləri ilə qarşılaşdılar.
Bizim.Media xəbər verir ki, bu barədə "The Wall Street Journal" (WSJ) qəzeti yazıb.
Köhnə hərbi anbarın ərazisində yerləşən 575 beton bunkeri zombi apokalipsisi deyil, məhkəmə iddiaları, bağ kooperativləri üslubunda qonşu davası, döyüşlər və sahibsiz itlər ucbatından düşən mübahisələr dalğası bürüyüb.
"Vivos xPoint" layihəsi kaliforniyalı biznesmen Robert Viçinonun ideyasıdır. Şirkət sahəsi 200 kvadratmetr olan keçmiş ordu anbarlarının 99 illik icarəsini satır.
Sxem isə olduqca sadədir:
"Çılpaq divarlar" üçün 55 000 dollaradək pul ödəyirsən;
Təmir və təchizata daha yüz minlərlə dollar qoyursan;
Müntəzəm olaraq torpaq icarəsi və xidmət haqları ödəyirsən.
Bunun müqabilində sağqalma həvəskarlarına bunker-restoran, bunker-hovuz və hətta bunker-atçılıq kompleksi də daxil olmaqla "5-ulduzlu bunker lüksü" vəd edilirdi. Lakin reallıq fərqli oldu: 10 il ərzində bunların heç biri tikilmədi.
Əvəzində sakinlər administrasiyanın gedişatda dəyişdirdiyi nəhəng bir qaydalar toplusu ilə üz-üzə qaldılar. Ən əsas qaydalardan biri isə dərhal qovulma (və qoyulan bütün pulların itirilməsi) təhlükəsi altında media ilə ünsiyyətin qadağan edilməsidir.
Yeraltı Vəhşi Qərb: Atışma və traktor duelləri
Bunkerlərə spesifik düşüncə tərzinə malik və əllərində silah olan insanlar toplaşdığından, münaqişələr sürətlə şifahi mübahisə çərçivəsindən çıxıb. İş hətta iki dəfə ştatın Ali Məhkəməsinə qədər uzanıb.
1-ci epizod. Dişə diş, yumruğa güllə: Ordu veteranı Devid Striter bütün ailəsini bunkere köçürüb, lakin tezliklə yerli kanalizasiya sisteminin işləmədiyini aşkar edib. O, etiraz etməyə çalışdıqda, şirkətin podratçıları tərəfindən təqib olunmağa başlayıb.
Hadisənin sonu belə bitib: "Vivos"un fəhləsi Striterin bunkerinin qarşısına traktor-yükləyici ilə gələrək onu yumruq davasına çağırıb. Striter tapançasını çıxaranda rəqibi onun üzərinə traktorla şığıyıb və "Sən axı heç vaxt adam öldürməmisən, elə deyil?" deyib. Bosniyada xidmət etmiş Striter "O bəli" cavabını verərək atəş açıb. Traktorçu sağ qalıb, məhkəmə isə Striterin özünü müdafiə çərçivəsində hərəkət etdiyini tanıyıb. İndi administrasiya veteranı qovmağa çalışır.
2-ci epizod. İt davası və barrikada qurulmuş bunker: Keçmiş dövlət qulluqçusu Daniel Sindorf öz bunkerınə 135 000 dollar investisiya qoyub. Lakin iki şey onu özündən çıxarıb: tariflərin qaldırılması və podratçının həyat yoldaşına hücum edən sahibsiz itləri.
Sindorf növbəti iti uzaqlaşdırmaq üçün tapançasını çıxaranda, onun barəsində "silahla hədələmə" ittihamı ilə şikayət edilib (yeri gəlmişkən, administrasiya bu qaydanı o köçəndən sonra tətbiq edib). Sindorfu evdən çıxarmaq qərarına gəliblər, lakin o, sadəcə olaraq bunkerə böyük bir qıfıl asaraq gedib və qarşılıqlı məhkəmə iddiası qaldırıb.
"Möhtəşəm bir oazis ola bilərdi"
Hazırda "Vivos" şirkətinə qarşı 100-dən çox icarəçinin iştirakı ilə kollektiv iddia hazırlanır. İnsanlar infrastrukturla bağlı aldadıldıqlarını və yaşayış üçün yararlı mənzil qanunlarının pozulduğunu iddia edərək pullarının geri qaytarılmasını tələb edirlər. Məlum olub ki, dünyanın bir ucunda restoran tikmək baha və çətin olduğundan, administrasiya sadəcə rüsumları toplamağa üstünlük verib.
Sakinlərdən birinin dostu Kris təəssüflə qeyd edir: "Bunkerin içinə daxil olduqda orada ideal bir sakitlik var. Çöldən heç bir səs gəlmir. Orada inanılmaz dərəcədə dinc bir ab-hava var. Bu, həqiqətən də möhtəşəm, sakit bir sığınacaq ola bilərdi".
Lakin görünən odur ki, insan təbiəti hər hansı bir nüvə partlayışından daha toksik çıxdı. Paranoid sağqalma həvəskarları təhlükəsizlik naminə ucqar bir yerdə qapandılar və nəticədə öz kiçik antiutopiyalarını yaratdılar.
Bizim.Media
