Platforma istifadəçilərə həm hazır memlərdən istifadə etməyə, həm də öz kontentlərini sürətli şəkildə yaratmağa imkan verir.
Texnologiyanın sürətlə inkişaf etdiyi bir dövrdə sosial media artıq yalnız yazı və şəkillərlə məhdudlaşmır. Yeni nəsil istifadəçilər daha sürətli, daha vizual və daha emosional ünsiyyət formalarına üstünlük verir. Məhz bu ehtiyacdan yaranan BRUH Social adlı yeni platforma gənclərin ünsiyyət tərzini dəyişməyi hədəfləyir.
BRUH Social ənənəvi mesajlaşma anlayışını yenidən formalaşdıraraq istifadəçilərə sözlər əvəzinə memlər (gülüş və ya spesifik məna ifadə edən şəkil, video və ya ifadə) vasitəsilə ünsiyyət qurmağa imkan verir.
Platforma xüsusilə Gen Z (Generation Z) auditoriyası (1997-ci ildən sonra anadan olanlar) üçün nəzərdə tutulub və onların gündəlik ünsiyyətini daha əyləncəli, sürətli və kreativ edir. Layihənin arxasında duran komanda bildirir ki, ideya sadə bir müşahidədən doğub: gənclər artıq fikirlərini uzun mesajlarla deyil, bir mem ilə daha təsirli şəkildə ifadə edir.
Platforma istifadəçilərə həm hazır memlərdən istifadə etməyə, həm də öz kontentlərini sürətli şəkildə yaratmağa imkan verir.
İstifadəçi interfeysi intuitiv və sadə qurulub, bu da tətbiqdən istifadənin sürətini artırır və paylaşım prosesini daha rahat edir. Eyni zamanda, viral yayılma mexanizmləri (rəqəmsal məzmunların sürətlə yayılma prosesi) platformanın qısa müddətdə geniş auditoriyaya çatmasını hədəfləyir.
Layihə 18 yaşlı Azərbaycanlı gənclər tərəfindən qurulub. Həmtəsisçilərdən İbrahim İbrahimli Türkiyənin Orta Doğu Texniki Universitetində təhsil alır, Ziya Sadıqzadə isə Çexiyanın Charles Universitetinin tələbəsidir. Onlar bundan əvvəl müxtəlif beynəlxalq və yerli yarışların qalibi olmuş, eyni zamanda bir neçə startapın həmtəsisçisi kimi təcrübə qazanıblar.
BRUH Social-ın diqqət çəkən tərəflərindən biri də daxil olduğu bazarın ölçüsüdür. Bu gün sosial media platformaları milyardlarla insanın gündəlik həyatının ayrılmaz hissəsinə çevrilib.
Instagram gündə 2 milyarddan çox aktiv istifadəçiyə malikdir, TikTok isə 1 milyarddan çox insan tərəfindən hər gün istifadə olunur. Bu isə o deməkdir ki, hər gün 3 milyarddan çox insan sosial platformalarda aktivdir və bu istifadəçilərin böyük hissəsini Gen Z təşkil edir.
Gen Z istifadəçiləri üçün sosial media artıq yalnız əyləncə vasitəsi deyil, həm də ünsiyyət, özünüifadə və yeni ideyaların kəşf edildiyi əsas mühitdir.
Onlar uzun mətnlərdən çox qısa, vizual və emosional kontentə üstünlük verir. Bu dəyişən davranış modeli yeni tip platformalar üçün geniş imkanlar yaradır və BRUH Social məhz bu boşluğu doldurmağa çalışır.
Mövcud sosial şəbəkələrdə memlər əsasən kontent formatı kimi istifadə olunur. BRUH Social isə bu yanaşmanı bir addım irəli apararaq memləri birbaşa ünsiyyət vasitəsinə çevirir. Bu fərqli yanaşma platformanı sadəcə sosial media tətbiqi deyil, yeni bir rəqəmsal ünsiyyət dili kimi təqdim edir.
Ekspertlər hesab edir ki, sosial media bazarı "kontent istehlakı" mərhələsindən "özünüifadə iqtisadiyyatı" mərhələsinə keçir. Yəni istifadəçilər artıq yalnız baxmaq deyil, özlərini fərqli və yaradıcı yollarla ifadə etmək istəyirlər. BRUH Social bu transformasiyanın mərkəzində yer almağı hədəfləyir.
Platforma hazırda istifadəçilər üçün açıqdır və hər kəs //bruhsocial.app/ vasitəsilə bu yeni ünsiyyət təcrübəsini sınaqdan keçirə bilər. Qısa müddətdə geniş auditoriyaya çatmağı planlaşdıran layihə, gələcəkdə qlobal sosial media bazarında öz yerini tutmağı qarşısına məqsəd qoyub.
BRUH Social danışmağın deyil, hiss etdiyini göstərməyin yeni yolunu təqdim edir.
Bizim.Media
