Amerikalı ekspert: “Konqresmen Şermanın Cənubi Qafqaz siyasəti ciddi araşdırılmalıdır” – ÖZƏL

ABŞ Konqresində erməni lobbisinin əsas oyuncaqlarından biri demokrat konqresmen Bred Şermandır. Son günlərdə isə onun fəaliyyəti ilə bağlı bir sıra qaranlıq məqamlar üzə çıxıb. Belə ki, müxtəlif kanallar vasitəsilə erməni lobbisindən külli miqdarda vəsait alan Şermanın Konqresdəki 30 illik fəaliyyəti faktiki olaraq erməni sepratizmi və terroruna dəstəkdən ibarət olub.

Bundan əlavə, Şermanın dəfələrlə şəxsi və iş həyatındakı qalmaqallarla gündəmə gəlib. O təyyarədə porno izləməsi, o cümlədən ofisində qadınlara qarşı cinsi qısnama əməlləri ilə ciddi tənqid hədəfinə tuş gəlib. Üstəlik, Şerman seçki kampaniyası üçün aldığı ianələri də şəxsi məqsədləri üçün istifadə edib.  

Şermanı Rusiya ilə nə bağlayır?

Şermanın fəaliyyətində ən diqqətçəkən məqamlardan biri də onun fəaliyyətinin Rusiyanın maraqları ilə üst-üstə düşməsidir. Şermanın təşəbbüsləri ABŞ-nin cari strateji prioritetləri ilə ziddiyyət təşkil edir. O, regionda sülh, kommunikasiya və enerji təhlükəsizliyi xəttini çətinləşdirməklə, faktiki olaraq Rusiya üçün əlverişli olan status-kvonun qorunmasına töhfə verir. 

Digər tərəfdən, Şerman ANCA-dan (Armenian National Committee of America) ianə və siyasi dəstək alır, ANCA isə öz növbəsində Rusiyaya bağlı separatçıları qorumağa çalışır. Şerman isə Konqresdə separatçıların azad olunması üçün qanun layihəsi hazırlamaqla, Rusiyanın marionetlərinə qalxan rolunu oynamış olur.

Bəs, barəsində bu qədər qalmaqallar, qanun pozuntuları olan konqresmen niyə cəzalandırılmır?

Amerikalı təhlükəsizlik eksperti İrina Tsukerman Bizim.Media-ya açıqlamasında ABŞ Konqresinin üzvü Bred Şermanın fəaliyyəti ilə bağlı bir sıra məsələlərin daha ciddi araşdırılmasının vacibliyini bildirib.

Onun sözlərinə görə, xüsusilə Şermanın erməni lobbisi, o cümlədən Erməni Milli Komitəsi (ANCA) ilə uzunmüddətli münasibətləri diqqət çəkir.

“Sherman ilə ANCA arasındakı münasibətlər bir neçə seçki dövrünü əhatə edən davamlı siyasi əməkdaşlıq təsiri yaradır. ANCA onun fəaliyyətini mütəmadi olaraq yüksək qiymətləndirib. Şermanın özü də bu təşkilatla görüşlərini və əməkdaşlığını açıq şəkildə nümayiş etdirib”, – deyə Tsukerman bildirib. 

Ekspertin fikrincə, burada əsas məsələ siyasi maliyyə, donor şəbəkələri və lobbiçilik fəaliyyətinin Konqres üzvünün qərarlarına nə dərəcədə təsir etməsidir.

“Seçicilər bilməlidirlər ki, kampaniyanı kim maliyyələşdirir, böyük maliyyə toplama tədbirlərini kim təşkil edir, hansı lobbi qrupları konqresmenlə görüşür və həmin görüşlərdən sonra hansı siyasi addımlar atılır. Seçki maliyyələşdirilməsi qaydalarına əməl olunub-olunmadığı da ayrıca araşdırılmalıdır. Şəffaflıq yalnız qanuni limitlərə riayət etməklə məhdudlaşmamalıdır”, – Tsukerman vurğulayıb.

Cənubi Qafqaz siyasətində qərəzli yanaşma

Tsukerman Şermanın Cənubi Qafqaz siyasətinin də ayrıca araşdırılmalı olduğunu düşünür.

“Şerman uzun illər ərzində Azərbaycanın əleyhinə, Ermənistan və keçmiş separatçı qurumun lehinə mövqelər nümayiş etdirib. O, Azərbaycana qarşı sanksiyaları, ABŞ-ın Azərbaycana hərbi yardımının məhdudlaşdırılmasını və Ermənistanla bağlı müxtəlif yardım paketlərini dəstəkləyib”, – ekspert deyib.

Onun sözlərinə görə, diqqət çəkən məqamlardan biri də Şermanın keçmiş “Artsax” və Ermənistan üçün ən azı 100 milyon dollarlıq təcili yardım paketinə çağırış etməsidir. Ekspert hesab edir ki, Vaşinqtonun Cənubi Qafqaz siyasəti ayrı-ayrı lobbi qruplarının maraqlarından deyil, ABŞ-ın real strateji maraqlarından çıxış etməlidir.

“Cənubi Qafqaza əsasən erməni millətçi narazılıqları prizmasından yanaşmağa davam etmək getdikcə daha ciddi strateji təhriflərə səbəb ola bilər. Ermənistanın özünün də Rusiyadan tarixi asılılığını azaltmaq, Azərbaycan və Türkiyə ilə münasibətləri normallaşdırmaq, Qərb investisiyalarını cəlb etmək və regional bağlantılarda iştirak etmək maraqları var. Köhnə lobbiçilik narrativlərinə bağlı qalan amerikalı siyasətçilər istəmədən Ermənistanın suverenliyini gücləndirə biləcək və eyni zamanda ABŞ maraqlarına xidmət edə biləcək regional transformasiyanın qarşısını ala bilərlər.

Region enerji, nəqliyyat və təhlükəsizlik baxımından ABŞ üçün getdikcə daha vacib olur. Buna görə Azərbaycan və Ermənistanla bağlı siyasət Rusiyanın və İranın təsirinin azaldılması, Şərq-Qərb nəqliyyat bağlantılarının inkişafı, enerji təhlükəsizliyi və davamlı sülh kimi məsələlər əsasında qiymətləndirilməlidir”, – o qeyd edib.

Şəxsi etika və seksual qısnama iddiaları

Tsukerman Şermanın şəxsi davranışı və Konqresdəki ofisinin iş mühiti ilə bağlı məsələlərin də nəzərdən keçirilməli olduğunu deyib.

“2025-ci ildə Şermanın təyyarədə seksual xarakterli görüntülərə baxması ilə bağlı yayılan fotolar onun şəxsi etik davranışı haqqında suallar yaratdı. Daha ciddi məsələ Şermanın keçmiş əməkdaşları ilə bağlı seksual xarakterli davranış iddiaları və Konqres ofisindəki iş mühiti barədə ortaya çıxan suallardır.

Konqres üzvü rəhbərlik etdiyi ofisdəki iş mühitinə görə institusional məsuliyyət daşıyır. Yüksək vəzifəli əməkdaşlarla bağlı şikayətlərə necə baxıldığı, əməkdaşların təzyiqdən qorunub-qorunmadığı və müstəqil şikayət mexanizmlərinin olub-olmadığı araşdırılmalıdır”, – Tsukerman deyib.

Bizim.Media