Kriştiano Ronaldo ildə 300 milyon dolları necə qazandı?

Lionel Messinin "Qızıl top"larının sayı daha çox ola bilər, lakin planetin əsas maliyyə yarışında Kriştiano Ronaldo mütləq və məğlubedilməz çempion olaraq qalmaqdadır.

Bizim.Media xəbər verir ki, portuqaliyalı superulduz ardıcıl dördüncü ildir ki (və son 11 ildə altıncı dəfə), "Forbes" jurnalının versiyasına görə dünyanın ən çox qazanan idmançılarının illik reytinqinə başçılıq edir. Onun son 12 ayda əldə etdiyi gəlir görünməmiş bir həddə — 300 milyon dollara çatıb.

Sözsüz ki, bu məbləğin əsas payını onun Səudiyyə Ərəbistanındakı müqaviləsi təmin edir:

"Əl-Nəsr" klubu 41 yaşlı canlı əfsanəyə bir mövsüm üçün 235 milyon dollar ödəyib. Ronaldo daha 65 milyon dolları isə futbol meydançasından kənarda — "Binance", "Nike" və "Perplexity" kimi qlobal brendlərin reklam siması qismində çıxış edərək qazanıb. Bundan əlavə, Kriştiano aktiv şəkildə investisiya yatırır: ötən il o, "Herbalife" şirkətinin texnoloji törəmə müəssisəsinə 7,5 milyon dollar vəsait qoyub. Onun elit daşınmaz əmlaklardan ibarət zəngin portfelini də unutmaq olmaz.

Reytinqin zirvəsindəki Səudiyyə izi

Siyahıda böyük sıçrayış edərək ikinci yerə yüksələn idmançı da Səudiyyə Ərəbistanı ilə sıx bağlıdır. Meksikalı boksçu Saul "Kanelo" Alvares Ər-Riyadda döyüşmək üçün müqavilə imzalayıb, daha sonra isə Las-Veqasda növbəti qarşılaşmasını keçirərək "Günahlar şəhəri"nin tarixində ən böyük tamaşaçı kütləsini toplayıb. Onun rinq daxilindəki xalis qonorarı 160 milyon dollar təşkil edib, biznes layihələri və sponsorluq müqavilələri isə 35 yaşlı döyüşçüyə əlavə 10 milyon dollar qazandırıb.

İlk üçlüyü Ronaldunun daimi rəqibi — Lionel Messi tamamlayır. Ötən il ərzində 38 yaşlı argentinalı ulduz 140 milyon dollar qazanıb, üstəlik, onun gəlirləri tən yarı bölünüb:

o, 70 milyon dolları meydanda — "İnter Mayami" klubunda çıxış edərək, eyni məbləği isə kommersiya fəaliyyətindən əldə edib. Hazırda canlı əfsanə özünün ən böyük hədəfinə — Argentina millisi ilə birlikdə DÇ-2026-da dünya çempionu titulunu qorumağa hazırlaşır.

Amerika idmanının əsas zənginləri və TOP-10

Siyahıda ABŞ-ı təmsil edən ilk idmançı əfsanəvi basketbolçu Lebron Ceyms olub (4-cü yer, 137,8 milyon dollar). O, bu məbləğin böyük hissəsini məhz reklam və biznesdən qazanıb. Onun dərhal ardınca isə Los-Ancelesin digər bir atleti — "Dodcers" beysbol klubunun ulduzu Şohei Otani qərarlaşıb.

Dünyanın ən çox qazanan 10 idmançısının siyahısı:

Kriştiano Ronaldo (Futbol, Portuqaliya) — $300 milyon

Kanelo Alvares (Boks, Meksika) — $170 milyon

Lionel Messi (Futbol, Argentina) — $140 milyon

Lebron Ceyms (Basketbol, ABŞ) — $137,8 milyon

Şohei Otani (Beysbol, Yaponiya) — $127,6 milyon

Stiven Karri (Basketbol, ABŞ) — $124,7 milyon

Con Ram (Qolf, İspaniya) — $107 milyon

Kərim Benzema (Futbol, Fransa) — $104 milyon

Kevin Dürant (Basketbol, ABŞ) — $103,8 milyon

Lüis Hemilton (Formul-1, Böyük Britaniya) — $100 milyon

Ronalda bu siyahıdakı ən yaşlı atletlərdən biridir, lakin o, hələ də ideal formadadır və çox güman ki, 2027-ci ildə də birinciliyini qoruyub saxlayacaq. Bununla belə, şübhəsiz ki, Kriştiano başı üzərinə Dünya Kubokunu qaldırmaq şansı qazanmaq üçün sərvətinin böyük bir hissəsindən məmnuniyyətlə imtina edərdi.

Bizim.Media