ABŞ Prezidentinin oğlu Donald Tramp (kiçik) avqust ayında Monqolustan səfəri zamanı Rusiya lideri Vladimir Putinin yaxın ətrafı ilə əlaqələri olan rusiyalı biznesmen, Beynəlxalq Boks Assosiasiyasının (IBA) prezidenti Umar Kremlyovla birgə ova gedib.
Bizim.Media xəbər verir ki, bu barədə informasiyanı "Financial Times" (FT) nəşri yerli bələdçilər, rəsmi şəxslər, uçuş məlumatları və sosial şəbəkə paylaşımlarına istinadən yayıb.
Avqustun sonunda Monqolustanın Uvs əyalətindəki ov düşərgəsində bir araya gələn tərəflər 2 gün birlikdə vaxt keçiriblər. Qazaxıstandakı mətbuat konfransından sonra çarter reysi ilə Ulan-Batora, oradan da düşərgəyə uçan Kremlyovu ABŞ-ın sanksiya siyahısında olan "Vosxod" vençur fondunun tərəfdaşı Artur Martirosov müşayiət edib.
Bələdçilərin sözlərinə görə, Tramp-kiçik və Kremlyov birgə foto çəkdirməyiblər. Kremlyovun Telegram-da paylaşdığı videolarda Trampın özü görünməsə də, ona xidmət edən təşkilatçılar kadra düşüb.
Donald Trampın (kiçik) nümayəndəsi bu görüşün biznes xarakteri daşımadığını, tərəfləri yalnız ov və balıqçılıq kimi şəxsi hobbini bölüşən "şəxsi dostluq" əlaqələrinin bağladığını bildirib.
Bildirilir ki, səfər zamanı Tramp (kiçik) nəsli kəsilməkdə olan nadir Altay arqualisini (dağ qoyunu) və Altay keçisini ovlayıb.
Milli Təhlükəsizlik Şurasının sabiq əks-kəşfiyyat direktoru Qolden Triplett bildirib ki, Rusiyanın xüsusi xidmət orqanları belə şəxsi kontaktlardan təsir və manipulyasiya vasitəsi kimi fəal istifadə edə bilərlər.
Bu məlumat Vaşinqton və Moskva arasında pərdəarxası diplomatik təmasların (Oslodan Sankt-Peterburqa qədər) intensivləşdiyi bir vaxtda xüsusi diqqət çəkir.
Umar Kremlyov sadəcə biznesmen deyil, o, Putinin şəxsi mühafizə xidməti (FSO) ilə sıx əlaqələrə malikdir və IBA rəhbəri kimi Rusiyanın idman diplomasiyasındakı ana fiqurlardan biridir. Bu görüşün baş tutması Moskva ilə Trampın yaxın ətrafı arasında alternativ, qeyri-rəsmi "təmas kanallarının" (back-channel) nə dərəcədə geniş olduğunu göstərir.
Kremlyovun daha əvvəl Trampın (kiçik) Karib adalarındakı toy mərasimində iştirak etməsi və xərclərin bir hissəsini qarşılaması (sonradan pulun qaytarıldığı bildirilsə də) bu əlaqələrin uzunmüddətli və sistemli xarakter daşıdığına işarə edir.
Vaşinqtonda Ukrayna nizamlanması üzrə "dizel sazişi" və hərbi-siyasi danışıqların fonunda bu cür qalmaqallı məlumatların sızması Tramp administrasiyasına qarşı daxili siyasi təzyiqləri və kəşfiyyat qurumlarının nəzarətini daha da artıracaq.
Bizim.Media
