Bu torpaqlar dövlət ehtiyacı üçün ALINACAQ

Nəqliyyat və kommunikasiya xətlərinin tikintisi, bərpası və təkmilləşdirilməsi üçün zəruri olan torpaq sahələri dövlət ehtiyacları üçün alınacaq.

Bizim.Media xəbər verir ki, bu məsələ Milli Məclisin bugünkü iclasında müzakirəyə çıxarılan Mülki Məcəllədə və “Torpaqların dövlət ehtiyacları üçün alınması haqqında” Qanunda dəyişiklik edilməsi barədə qanun layihəsində öz əksini tapıb.

Layihəyə əsasən, dövlət əhəmiyyətli yolların, tunellərin (metro tunelləri daxil olmaqla), magistral neft və qaz boru kəmərlərinin, yüksək gərginlikli elektrik şəbəkələrinin, kanalizasiya və digər hidrotexniki qurğuların, eləcə də dəmir yolu, metropoliten və tramvay xətlərinin tikilməsi və quraşdırılması üçün zəruri olan torpaq sahələri dövlət ehtioyacı üçün alına biləcək.

Bundan əlavə, dəniz və hava limanlarının və ya aerodromların, dəmiryolu, metropoliten və tramvay stansiyalarının, depoların tikilməsi və genişləndirilməsi üçün tələb olunan torpaq sahələrinin də dövlət ehtioyacları üçün alınması mümkün olacaq.

Qanun layihəsi səsə qoyularaq birinci oxunuşda qəbul edilib.

Günay Şahmar, Bizim.Media