1980-ci illərin dəbdəbəsinə işarə, yoxsa ənənələrin simvolu? Britaniyanın baş naziri Endi Börnhemin geyim tərzi yenidən moda müzakirələrinə səbəb olub.
Bizim.Media xəbər verir ki, bu barədə The Guardian yazıb.
Baş nazirin qarderobundakı “gizli silah”
Endi Börnhemin üslubunda yeni mərhələ bu həftə Derbişir qraflığının İlkinqton şəhərində keçirilən fotosessiyada üzə çıxıb. Baş nazir tədbir zamanı asqılı şalvarla kameralar qarşısına keçib.
Tünd rəngli, dar biçimli və klipslə deyil, düymələrlə bərkidilən asqılar baş nazirin pencəyini açaraq yerli sakinlərdən biri ilə qucaqlaşmasına qədər demək olar ki, nəzərə çarpmayıb.
Börnhemin üzərindəki xüsusi sifarişlə hazırlanmış Eaton modeli kostyumun qiyməti 595 funt sterlinqdir. Kostyum ənənəvi London dərzisi Oliver Brown tərəfindən Yorkşirdəki Alfred Brown fabrikinin istehsal etdiyi 100 faiz merinos yunundan hazırlanıb. Dərzi atelyesindən bildirilib ki, kostyum həqiqətən onlara məxsusdur, lakin asqılar başqa yerdəndir.
Şalvarda kəmər üçün ilgəklər olmadığından onu asqısız geyinmək çətin olardı. Lakin moda tarixçisi Xloya Çapin hesab edir ki, buna əslində ehtiyac yox idi. Çünki şalvarda yan tənzimləyicilər mövcuddur.
Siyasət və üslub
Son iki il ərzində Börnhemin komandasında çalışmış siyasi mənbə onun geyim seçimlərini belə xarakterizə edib: “Endi suflyorun göstərişləri ilə yaşayan siyasətçi deyil. O, sadəcə belə geyinir”.
Bununla belə, keçmiş Böyük Mançester meri və onun komandası müxtəlif tədbirlər üçün geyim seçimlərini diqqətlə nəzərdən keçirir.
Mənbənin sözlərinə görə, Börnhemin geyimləri peşəkar və bacarıqlı siyasətçi obrazı ilə yanaşı, onun digərlərindən fərqləndiyini göstərməlidir. TikTok vasitəsilə geniş tanınan ilk britaniyalı baş nazir kimi təqdim olunan Börnhem vizual imicin siyasətdə əhəmiyyətini yaxşı anlayır.
Üsyançıların geyimindən siyasi status simvoluna
Asqıların tarixçəsi XVIII əsrdə Fransaya gedib çıxır. Əvvəllər onlar şalvarın bel hissəsinə düymələrlə bərkidilən parça zolaqları olub və uzun müddət alt geyimi hesab edilib. Buna görə də onları nümayiş etdirmək ədəbsizlik sayılırdı.
1960–70-ci illərdə Britaniyada asqılar yenidən populyarlaşdı. Modlar və skinhedlər onları antisistem üsyanının elementlərindən biri kimi istifadə edirdilər.
1980-ci illərdə isə asqılar öz populyarlığının zirvəsinə çatdı. Onlardan həm Uoll-Strit maliyyəçiləri, həm də panklar istifadə edirdi. Alt geyimin açıq şəkildə nümayiş etdirilməsi həmin dövrdə güclü sosial və mədəni mesaj hesab olunurdu.
Asqılar hansı mesajı verir?
Britaniya siyasətində asqılar çoxdan ənənə və klassik üslubla əlaqələndirilir. Uinston Çörçill və Maykl Portillo kimi siyasətçilər də bu aksessuara üstünlük veriblər.
Xloya Çapinin fikrincə, burada əsas məsələ kontekstdir. Məsələn, leyboristlər güc nümayiş etdirmək üçün qırmızı rəngdən, mühafizəkar seçicilərlə ünsiyyət zamanı isə mavi rəngdən istifadə edə bilirlər.
Ambisiyalı siyasətçi üçün asqılar isə ikili mesaj daşıya bilər: onlar həm elit görünür, həm də fəhlə-kəndli üslubunu xatırladır.
Məhz bu ziddiyyətli görüntü özünü həm ənənəvi siyasi elitanın nümayəndəsi, həm də sıravi insanlara yaxın lider kimi göstərmək istəyən siyasətçilər üçün cəlbedici ola bilər.
Bizim.Media
