İsti hava menyunu dəyişdi: Fransada şokolad, qəhvə və sosiska satışı kəskin azalıb

Fransada qeydə alınan güclü istilər əhalinin istehlak vərdişlərinə ciddi təsir göstərib. İyun ayının sonlarında müşahidə olunan yüksək temperaturlar fonunda mağazalarda ənənəvi məhsullara olan tələbat kəskin azalıb.

Bizim.Media xəbər verir ki, "Le Figaro" nəşrinin "NielsenIQ" və "Circana" şirkətlərinin məlumatlarına istinadən yaydığı hesabata görə, fransızlar isti günlərdə qidalanma tərzlərini tamamilə dəyişiblər.

İstidən xilas olmaq istəyən alıcılar əsasən soyuducu məhsullara, dondurmaya, suya və sərinləşdirici içkilərə üstünlük veriblər. Həmçinin, ventilyatorlar və günəşdən qoruyucu vasitələrin satışı rekord həddə çatıb.

İsti hava səbəbindən aşağıdakı məhsulların satışında nəzərəçarpacaq geriləmə qeydə alınıb:

İsti qidalar və içkilər: Şorbalar (-16%), çay (-12%) və qəhvə (-11%) satışı kəskin azalıb.

Şirniyyatlar: Şokolad plitələri və şəkər tozu satışında 20%-lik, şokolad pastalarında isə 11%-lik azalma var. Bəzi ticarət şəbəkələri hətta istidə ərimə riski olduğu üçün şokoladın çatdırılmasını müvəqqəti dayandırıb. Ümumilikdə qənnadı məmulatları və desertlərin satışı 12-19% arası azalıb.

Alkoqollu içkilər: Möhkəmləndirilmiş şərabların satışı 30,6%, digər spirtli içkilərin isə 25,5% düşüb.

Bişirmə tələb edən qidalar: Hazırlanması üçün istilik tələb edən yeməklərin satışı 18% azalıb; fransızlar daha çox salatlar, tabule və qazpaço kimi soyuq yeməklərə keçid ediblər.

Maraqlıdır ki, isti havalarda ənənəvi sayılan barbekü məhsulları da populyarlığını itirib: sosiska satışı 12%, manqal üçün yanacaq vasitələrinin satışı isə 30% azalıb.

Pərakəndə satış üzrə ekspert Olivye Dover bu vəziyyəti belə izah edir: "Barbekü və pivəyə tələbat müəyyən temperatur həddinə qədər artır. Lakin hava 40 dərəcəyə çatanda artıq heç kimin manqal başında durmağa cəsarəti çatmır. İsti temperatur artdıqca bu məhsulların satışı əks effekt verməyə başlayır".

Bizim.Media