Rusiyada yeni qadağa: "Google" və "Apple ID" ilə girişlər ləğv edilir

Rusiyanın daxili internet resurslarında (Runet) istifadəçilərin xarici texnologiya nəhənglərinin sistemləri vasitəsilə qeydiyyatdan keçməsi və platformalara daxil olması tamamilə qeyri-mümkün hala gəlir. Ölkənin iri yerli xidmətləri, saytları və elektron ticarət platformaları rusiyalı istifadəçilərə "Gmail" (Google) və "Apple ID" vasitəsilə avtorizasiyanın tezliklə dayandırılacağı barədə kütləvi xəbərdarlıqlar göndərməyə başlayıb.

Bizim.Media Rusiya KİV-nə istinadən xəbər verir ki, bu addım ölkədə qüvvəyə minən yeni qanunvericilik tələbləri ilə bağlıdır.

Qanun nəyi tələb edir?

Rusiya qanunvericiliyinə edilən son düzəlişlərə əsasən, yerli saytlar və tətbiqlər istifadəçilərin avtorizasiyası üçün yalnız Rusiya daxili xidmətlərindən istifadə etməlidir. Qanun xarici sistemlərin (o cümlədən Google və Apple) köməyi ilə rusiyalı istifadəçilərin identifikasiya edilməsini qəti şəkildə qadağan edir.

Məhz bu səbəbdən şirkətlər öz müştərilərinə hesabatlarını qorumaq üçün dərhal digər giriş üsullarına keçməyi tövsiyə edirlər.

İstifadəçilərə hansı alternativlər təklif olunur?

Platformalar yarana biləcək profil itkilərinin qarşısını almaq üçün vətəndaşlara giriş məlumatlarını yeniləməyi tapşırıb.

Rusiyalılara xarici provayderlər əvəzinə bu üsullardan istifadə təklif olunur:

Yerli poçt xidmətləri (məsələn, Mail.ru və ya Yandex);

Rusiya mobil operatorlarının telefon nömrələri;

Dövlət Xidmətləri portalı (Gosuslugi);

Daxili sosial şəbəkə profilləri (VK ID).

Ekspertlər bildirirlər ki, keçid dövrü başa çatdıqdan sonra "Google" və ya "Apple" düymələri vasitəsilə rus dilli saytlara daxil olmaq tamamilə bloklanacaq və məlumatlarını dəyişməyən şəxslər öz şəxsi kabinetlərinə giriş imkanını itirəcəklər.

Bizim.Media