Yuri Uşakov: "Rusiya Ukrayna ilə qapalı təmasları saxlayır"

Rusiya Prezidentinin köməkçisi Yuri Uşakov rəsmi Moskva ilə Kiyev arasında gizli kanallar vasitəsilə əlaqələrin hələ də davam etdiyini bəyan edib.

Bizim.Media Rusiya KİV-nə istinadən xəbər verir ki, Kremlin rəsmisi bu barədə iyunun 7-də jurnalistlərin iki ölkə arasındakı mövcud qarşılıqlı münasibətlərə dair suallarını cavablandırarkən danışıb.

Uşakov hazırkı gərginliyə rəğmən tərəflər arasında ünsiyyətin tamamilə kəsilmədiyini vurğulayıb:

"Bizim Kiyev rejimi ilə həm açıq (ictimaiyyətə məlum olan), həm də qapalı təmaslarımız mövcuddur və bu əlaqələr qorunub saxlanılır".

Digər tərəfdən, Rusiya Prezidentinin mətbuat katibi Dmitri Peskov Ukrayna Prezidenti Volodimir Zelenskinin Vladimir Putinə ünvanladığı son məktub barədə danışıb. Peskov həmin ismarışın adi, növbətçi xidməti qaydada rəsmi kanallarla Kremlə çatdırıldığını qeyd edib.

Ukrayna tərəfinin bu addımı mətbuatda geniş şouya çevirməsini tənqid edən Kremlin sözçüsü mövzuya özünəməxsus şəkildə yanaşıb:

"Əgər məktub göndərmək, nəsə ötürmək istəyirsənsə, götür və ötür. Yox, əgər bunun üçün meqafondan (ictimai bəyanatlardan və mətbuatdan) istifadə edirsənsə, o zaman buna məktub deməyin", — deyə Peskov Kiyev rəhbərliyinə ismarış yollayıb.

Bizim.Media