Ermənistanın Baş naziri Nikol Paşinyan 2028-ci ildə Azərbaycana səfər etmək imkanının olacağına ümid etdiyini bildirib.
Bizim.Media xəbər verir ki, Paşinyan bunu mayın 4-də İrəvanda keçirilən Avropa Siyasi Birliyinin VIII sammitinin plenar iclasında çıxışı zamanı deyib.
“Ümid edirəm ki, Avropa Siyasi Birliyinin sammitinin keçiriləcəyi 2028-ci ildə Azərbaycana səfər etmək imkanım olacaq”, - deyə Ermənistanın Baş naziri bildirib.
Paşinyan xatırladıb ki, Azərbaycan Prezidenti İlham Əliyev ilk dəfə Ermənistanda keçirilən tədbirdə iştirak edir. O qeyd edib ki, Azərbaycan lideri sammitə məsafədən qoşulub.
Ermənistanın Baş naziri əlavə edib ki, Ermənistan və Azərbaycan Avropa Siyasi Birliyinin sammitlərinə ev sahibliyi məsələsində bir-birinin namizədliyini qarşılıqlı şəkildə dəstəkləyiblər.
Paşinyan həmçinin Türkiyə Prezidenti ilə ilk görüşünün Avropa Siyasi Birliyinin Praqada keçirilən birinci sammiti çərçivəsində baş tutduğunu xatırladıb.
Onun sözlərinə görə, bu gün Türkiyənin vitse-prezidenti Cevdet Yılmaz İrəvanda keçirilən sammitdə iştirak edir.
Paşinyan bildirib ki, bu, Türkiyə vitse-prezidentinin Ermənistana ilk səfəridir.
Qeyd edək ki, Avropa Siyasi Birliyinin VIII sammiti bu gün İrəvanda keçirilir.
Sammit “Gələcəyi qururuq: Avropada birlik və dayanıqlılıq” devizi altında təşkil olunub.
Bizim.Media
