Türkiyənin Adana şəhərində anomal istilər fonunda boğulma təhlükəsinə baxmayaraq, sərinləmək üçün suvarma kanalına girən azyaşlı uşaq atası tərəfindən kəmərlə döyülüb.
Bizim.Media xəbər verir ki, bu barədə "Demirören Haber Ajansı" (DHA) məlumat yayıb.
Məlumata görə, yay mövsümündə tez-tez boğulma hadisələrinin yaşandığı Adanada bir qrup uşaq təhlükəli olmasına baxmayaraq sərinləmək məqsədilə suvarma kanalına daxil olaraq üzməyə başlayıb.
Bir müddət sonra uşaqlardan birinin atası əraziyə gələrək oğlunun kanalda olduğunu görüb və ona kəskin reaksiya göstərib.
Atasının qəzəbini görən azyaşlı dərhal kanaldan çıxıb. Lakin hirsi soyumayan ata oğlunu yerə yıxaraq şalvarının kəməri ilə amansızcasına döyməyə başlayıb. Ətrafdakı sakinlər müdaxilə edərək qəzəbli atanı güclə sakitləşdiriblər və azyaşlını onun əlindən alıblar.
Sosial şəbəkələrdə kəskin etirazlara səbəb olan o dəhşətli anlar ətrafdakı vətəndaşların mobil telefon kameraları tərəfindən anbaan qeydə alınıb.
Bizim.Media
