AXCP sədri Əli Kərimli Azərbaycan Ziyalılar Birliyinin sədri, Milli Şuranın üzvü Eldəniz Quliyevin məhkəməyə verilməsini hökümətin absurd addımlarından biri kimi qiymətləndirib. O, bu barədə facebook səhifəsində yazıb:
“Hökumətin
absurd addımları davam edir. İndi də daxili işlər naziri Ramil Usubov Eldəniz
Quliyevi həbs etdirmək istəyir. Eldəniz Quliyev tanınmış ssenarist və
kinodramaturqdur. Onlarla filmin çəkilməsində iştirak edib. O cümlədən Xocalı
faciəsi haqqında çəkilmiş “Haray” filminin ssenari müəlliflərindən biridir.
Dram əsərlərinin, hekayə və povestlərinin toplularından ibarət xeyli kitabı çap
olunub. Eldəniz bəy Azərbaycan Ziyalılar Birliyinin sədri, Milli Şuranın
Koordinasiya Mərkəzinin üzvüdür. Ən vacibi isə hər zaman haqsızlığa qarşı səsini
ucaldan ziyalıdır. Eldəniz bəy məhz Milli Şura rəhbərliyində təmsil olunduğuna,
haqsızlığın, repressiyaların qarşısında susmadığına görə hakimiyyətin qəzəbinə
gəlib. Hədəf Milli Şuradır!
İnanıram ki, bu proses də hakmiyyətin özünüifşasına çevriləcək. Bütün indiyə qədər olanların hamısı bir tərəfə, təkcə daxili işlər nazirinin Ziyalılar Birliyi sədrini həbs etdirmək istəməsi dövlətin qeyri-demokratikliyini, zor üzərində bərqərar olduğunu, azad sözə dışmən kəsildiyini sübut etmirmi?
Bu gün Eldəniz bəyin məhkəməsində iştirak etdik. Ona dəstəyimiz davam edəcək. Başqa vaxt deyirik ki, hanı bu ölkənin ziyalıları? Budur, ölkənin ziyalısı Eldəniz bəy meydandadır. Bu xalqın sözünü dediyi üçün cəzalandırılır. Onu bu çətin məqamda tək qoymamalıyıq, hamımız ona dəstək olmalıyıq”.
Azadlıq.info
