Almaniyada Fridrix Mertsin rəhbərlik etdiyi hakim koalisiyanın başında duran Xristian-Demokrat İttifaqının (XDİ/XDS) hakimiyyətə gəlməsindən hələ il yarım belə keçməmiş, partiya federal torpaq seçkilərində ilk dəfə ultra-sağçılara məğlub olub.
Bizim.Media “Politico” nəşrinə istinadla xəbər verir ki, qarşıdan gələn bazar günü daha bir federal torpaqda – Meklenburq-Ön Pomeraniyada və eyni zamanda Berlində səsvermə keçiriləcək.
Məhz həmin gün kansler Fridrix Merts XDS rəhbərliyi ilə görüş keçirəcək və bu görüşdə onun istefası barədə qərar qəbul edilə bilər.
"Politico" nəşrinin yazdığına görə, yüksək rütbəli partiya rəsmiləri seçicilər arasında dəstəyin sürətlə itirilməsinin qarşısını almaq üçün kanslerin dəyişdirilməsinin zəruri olub-olmadığını artıq şəxsi söhbətlərində müzakirə edirlər.
Bu həftə şəxsən Mertsin populyarlıq reytinqi 14%-ə, XDS və onun müttəfiqi olan XSS (Xristian-Sosial İttifaq) blokunun reytinqi isə görünməmiş həddə – 18%-ə düşüb.
Eyni zamanda, ultra-sağçı "Almaniya üçün Alternativ" (AfD) partiyasını seçicilərin 29%-i dəstəkləyir; iki həftə əvvəl Saksoniya-Anhalt torpağında keçirilən seçkilərdə bu partiya demək olar ki, 44% səs qazandığı halda, XDS-in payı iki dəfədən çox azalıb.
Bizim.Media
