Türkiyə, Səudiyyə Ərəbistanı və Pakistan arasında imzalanan birgə müdafiə haqqında Məkkə sazişi gələcəkdə digər ölkələrin, o cümlədən Misirin də bu razılaşmaya qoşulmasına imkan verir.
Bizim.Media xəbər verir ki, Türkiyə Prezidenti Rəcəb Tayyib Ərdoğan bunu “Al Jazeera” telekanalına müsahibəsində deyib.
Onun sözlərinə görə, sazişin əsas şərti iştirakçı ölkələrdən hər hansı birinə qarşı təcavüz baş verdiyi təqdirdə tərəflərin birgə addımlar atmasıdır. Ərdoğan bu razılaşmanın “bütün dünyaya mühüm mesaj göndərdiyini” bildirib.
Türkiyə lideri həmçinin Hörmüz boğazında gəmiçiliyin bərpasının Ankara üçün prioritet olduğunu vurğulayıb.
O, boğazın fəaliyyətinin daha uzun müddət dayandırılmasının heç kimin maraqlarına cavab vermədiyini qeyd edib.
Xatırladaq ki, 7 avqust 2026-cı ildə Səudiyyə Ərəbistanının Məkkə şəhərində Səudiyyə Ərəbistanı, Pakistan və Türkiyə arasında qarşılıqlı müdafiə sazişi imzalanıb. Sazişə əsasən, üç dövlətdən hər hansı birinə qarşı silahlı hücum onların hər üçünə qarşı hücum kimi qiymətləndirilməlidir.
Bizim.Media
