İran nümayəndə heyəti İsveçrənin Bürgenştok kurortunda keçirilən dördtərəfli sammitin məkanını tərk etməyib və müzakirələr davam edir.
Bizim.Media xəbər verir ki, bu barədə məlumatı ABŞ-nin "Axios" nəşrinin tanınmış analitik və jurnalisti Barak Ravid özünün rəsmi "X" hesabında paylaşıb.
"İranlılar getməyiblər, onlarla ABŞ arasında danışıqlar davam edir", — deyə Ravid sammitdə iştirak edən yüksək rütbəli diplomatik mənbəsinə istinadən yazıb.
Qeyd edək ki, bir qədər əvvəl bəzi İran mətbuatı orqanları Tehrandan gələn nümayəndə heyətinin ABŞ Prezidenti Donald Trampın son təhdid dolu bəyanatlarına etiraz olaraq İsveçrədəki danışıqlar masasını qəfildən tərk etdiyini iddia etmişdi. Lakin Qərb və vasitəçi ölkələrin mənbələri bu məlumatı təkzib edirlər.
Xatırladaq ki, iyunun 21-də İsveçrədə ABŞ, İran, Pakistan və Qətərin iştirakı ilə dəniz blokadasının qaldırılması və dondurulmuş aktivlər üzrə qarşılıqlı memorandumun icrası məqsədilə yüksək səviyyəli tarixi sammit işə başlayıb. Tərəflər arasında yaranan informasiya ziddiyyətləri kuluarlarda diplomatik gərginliyin hələ də yüksək olduğunu göstərir.
Bizim.Media
