ABŞ blokadasının ləğvindən sonra ilk nəhəng konteyner gəmisi İrana daxil oldu

Birləşmiş Ştatlar ilə imzalanmış tarixi saziş və rəsmi Vaşinqtonun tətbiq etdiyi iqtisadi-dəniz blokadasının qismən ləğv edilməsindən sonra ilk iritonnajlı beynəlxalq konteyner gəmisi İranın cənubundakı strateji limana daxil olub.

Bizim.Media xəbər verir ki, bu barədə məlumatı İranın Limanlar və Dənizçilik Təşkilatı yayıb.

Xarici yük gəmisi Hörmüz boğazından keçərək ölkənin ən mühüm dəniz qapısı hesab olunan Bəndər-Abbas limanının "Şəhid Rəcaü" terminalında lövbər salıb. Bu hadisə son bir neçə ildə beynəlxalq dəniz nəqliyyatı şirkətlərinin sanksiyalardan yayınaraq İrana birbaşa həyata keçirdiyi ilk rəsmi böyük reys kimi tarixə düşüb.

İran rəsmiləri blokadanın qaldırılmasından dərhal sonra xarici gəmilərin ölkə limanlarına qayıtmasını milli iqtisadiyyat və xarici ticarət üçün yeni bir dövrün başlanğıcı kimi qiymətləndirirlər:

Birbaşa tədarük: Əvvəllər sanksiyalar səbəbindən yüklər Üman və ya digər körfəz ölkələrində kiçik gəmilərə boşaldılaraq İrana gətirilirdisə, artıq birbaşa logistik xətlər bərpa olunur. Bu da daşınma xərclərini kəskin azaldacaq.

Yük dövriyyəsinin artması: Terminal rəhbərliyi yaxın günlərdə Asiya və Avropadan daha bir neçə konteyner daşıyıcısının limana gələcəyini bəyan edib.

Xatırladaq ki, bir qədər əvvəl İsveçrənin vasitəçiliyi ilə ABŞ və İran arasında memorandum imzalanmış və bunun ardınca regional gərginliyin azaldılması istiqamətində müəyyən addımlar atılmışdı.

Hərçənd ki, son günlər İran XİN Livan cəbhəsində tam atəşkəs olmadan ABŞ ilə növbəti mərhələyə keçməyəcəyini desə də, əldə olunmuş iqtisadi və logistik güzəştlərin, o cümlədən dəniz blokadasının ləğvinin icrası artıq praktik olaraq öz bəhrəsini verməyə başlayıb.

Bizim.Media