Viktoriya Bekhemdən etiraf: "İllərlə xarici görkəmimə nifrət etmişəm"

Dünyaca məşhur dizayner, "Spice Girls" qrupunun keçmiş üzvü Viktoriya Bekhem xarici görkəminin illərlə sərt tənqid olunmasına və gözəllik sənayesinin daimi təzyiqlərinə baxmayaraq, yalnız yaşlandıqca özünü qəbul etməyi öyrəndiyini etiraf edib.

Bizim.Media xarici KİV-ə istinadən xəbər verir ki, Böyük Britaniyanın məşhur "The Times" qəzetinə müsahibə verən 52 yaşlı ulduz kompleksləri, qocalmağa qarşı münasibəti və artıq başqalarının gözləntilərinə cavab vermək istəməməsi barədə səmimi açıqlamalar verib.

"Həyatımın böyük hissəsində özümü kifayət qədər yaxşı hiss etməmişəm və necə göründüyüm xoşuma gəlməyib", — deyə Viktoriya etiraf edib.

Ulduzun sözlərinə görə, məhz yaşının artması ona daxili dinclik tapmağa kömək edib:

"Yaşlanmağın ən gözəl tərəfi odur ki, artıq xarici görkəmimi tamamilə qəbul edirəm. Düzünü desəm, bu, digər variantlardan (keçmiş komplekslərdən) mütləq şəkildə daha yaxşıdır".

Bekhem müsahibəsində gözəllik sənayesinin insanlara məcburi şəkildə qəbul etdirdiyi qocalma əleyhinə ("anti-aging") vasitələrə qarşı da sərt fikirlər səsləndirib:

"Mən hər hansı bir kremin qocalmanı dayandıra biləcəyinə inanmıram. Düzünü desəm, “anti-aging” termini mənə çox neqativ görünür. Bu, sadəcə olaraq yaxşı qurulmuş marketinq gedişidir".

Yaşına baxmayaraq, dizayner hazırda 20 və ya 30 yaşlarında olduğundan daha çox məşq etdiyini bildirib:

"50-dən yuxarı yaşda olmağın özünü məhdudlaşdırmalı olduğun mənasına gəlmir. Yaşlandıqca da möhtəşəm görünməyə davam etmək və inanılmaz uğurlar qazanmaq mümkündür".

Dörd uşaq anası olan Viktoriya illər keçdikcə ünvanına gələn tənqidlərə də əhəmiyyət vermədiyini vurğulayıb:

"Yetkinləşməyin ən böyük üstünlüyü — başqalarının nə düşündüyünün sənin üçün tamamilə əhəmiyyətsiz olmasıdır. İndi öz hekayəmə özüm nəzarət edirəm. Mən 50 yaşında ayıldım və başqalarının fikri mənə tamamilə maraqsız gəldi".

Bizim.Media