İlon Maskın X (keçmiş Twitter) platformasında İsveçrənin Lauterbrunnen kəndi ilə bağlı viral videonu paylaşması qlobal turizm ajiotajına səbəb olub. Yaradıcı Ceyms Lukas tərəfindən çəkilən videoda kəndin məşhur 300 metrlik Ştaubbax şəlaləsi əks olunub.
Bizim.Media xəbər verir ki, paylaşım qısa müddətdə 50 milyondan çox baxış toplayıb.
İstifadəçilərin çoxu bu yerin "süni intellekt tərəfindən yaradılmış" və ya "mükəmməl ekran qoruyucusu" kimi göründüyünü qeyd ediblər.
Məşhurluğun gətirdiyi narahatlıq
Lakin bu diqqət yerli rəhbərliyi sevindirməyib. Lauterbrunnen meri Karl Nefplin cəmi 2 300 nəfər əhalisi olan kiçik kənd üçün bu cür qəfil turist axınının ciddi problemlər yarada biləcəyini deyib.
Merin sözlərinə görə, məşhurların paylaşımları sakit məkanları bir anda qlobal hədəfə çevirir, lakin kəndin infrastrukturu buna hazır deyil:
Müşahidə meydançalarında izdiham yaşanır;
Dar yollar yüklənir;
Turistlər fotoşəkil çəkdirmək üçün tez-tez şəxsi mülkiyyət sərhədlərini pozurlar.
Pullu giriş müzakirə olunur
Yerli hakimiyyət turistlərə ictimai nəqliyyatdan istifadə etməyi, təmizliyə riayət etməyi və şəxsi mülkiyyətə hörmətlə yanaşmağı tövsiyə edir.
Qeyd olunur ki, bənzər vəziyyət İsveçrənin İseltvald kəndində də yaşanmışdı və orada məşhur serialdan sonra populyarlaşan pirsa giriş pullu edilmişdi.
İndi Lauterbrunnen rəhbərliyi də Ştaubbax şəlaləsi daxil olmaqla, bəzi təbiət obyektlərinə giriş haqqı tətbiq etməyi müzakirə edir.
Bu hadisə İlon Mask kimi nüfuzlu şəxslərin bircə paylaşımının kiçik bir məkanın taleyini necə sürətlə dəyişə biləcəyini növbəti dəfə sübut etdi.
Bizim.Media
