Avropa siyasi institutlarının şəffaflığı və prinsipiallığı ilə bağlı illərdir formalaşmış təsəvvürlərin sadəcə yalanlardan ibarət olduğu növbəti dəfə faktlarla ifşa olunub.
Doğrudur, Avropa İttifaqında yüksək vəzifələr tutan şəxslərin erməni lobbisi ilə bağlılığı məsələsi əvvəllər də dəfələrlə gündəmə gəlib. Lakin son ortaya çıxan faktlar artıq bu əlaqələrin mövcudluğuna heç bir şübhə yeri qoymayıb.
MÖVZU İLƏ BAĞLI:
Okamponun video-etirafı: “Borrel mənim komandamın üzvüdü”, “Paşinyanı uzaqlaşdırmaq lazımdır” – VİDEO
Erməni lobbisi ilə əməkdaşlığın etirafı
Belə ki, “Minval Politika” tərəfindən yayılan və geniş rezonans doğuran videomateriallar isə vəziyyətin daha mürəkkəb və ziddiyyətli olduğunu göstərir. Söhbət sabiq beynəlxalq prokuror Luis Moreno Okampo və onun oğlu Tomas Moreno Okamponun səs yazısından gedir.
Həmin səs yazısında Luis Moreno Okampo erməni lobbisi ilə əməkdaşlıq etdiyini açıq şəkildə etiraf edib.
Okampo həmçinin Avropa diplomatiyasının keçmiş rəhbərlərindən biri Cozef Borrelin onun üçün çalışdığını da vurğulayıb:
“Borrel indi mənim üçün Avropa Parlamentində işləyir. Mən orada çıxış edə, suallar qaldıra, onları yönləndirə və komissar fon der Lyayenə təzyiq göstərə, beləliklə Avropa siyasətini formalaşdıra bilərəm”.
Azərbaycana qarşı qurulan çirkin plan
Ən diqqətçəkən məqam isə Okamponun hansı planlarda iştirak etdiyini də açıq şəkildə etiraf etməsidir. Səs yazısında sabiq prokuror Avropa Məhkəməsi vasitəsilə Avropa Komissiyasını Azərbaycanla müqavilənin ləğvinə məcbur etmək və ABŞ-dakı erməni lobbisi ilə əlaqəli şəkildə təzyiqi artırmaq üçün çalışdığını qeyd edib.
Bundan əlavə, Ermənistanın daxili işlərinə müdaxilə və Paşinyanın hakimiyyətdən uzaqlaşdırılması da erməni lobbisinin Okampo vasitəsilə reallaşdırmağa çalışdığı planın tərkib hissəsidir. Bir sözlə, Luis Okampo erməni lobbisinin maliyyə dəstəyi və sifarişi ilə regional sülhə və Azərbaycana qarşı kampaniya aparır.
“Avropa Parlamentindəki biabırçılıqların arxasındakı tək səbəb korrupsiyadır”
Mövzu ilə bağlı millət vəkili, AŞPA-dakı nümayəndə heyətimizin üzvü olmuş Asim Mollazadə Bizim.Media-ya açıqlamasında bildirib ki, Luis Okamponun açıqlamasında təəccüblü heç nə yoxdur:
“Həm beynəlxalq təşkilatlarda, həm Avropa Parlamentində, həm də Avropa Şurasının Parlament Assambleyasında belə biabırçı mənzərələr aşkarlanır. Bu biabırçılıqların arxasındakı tək səbəb korrupsiyadır. Çox təəssüf ki, Okampo və bu kimi bəzi Avropa rəsmiləri öz şəxsi maraqları üçün bir çox dəyərləri ayaqlar altına atırlar.
Mən öz müşahidələrimə əsasən deyə bilərəm ki, Avropa Parlamenti bir sıra imkanlı şəxslərin əlində alətə çevrilib. Həm Borrel, həm də digər Avropa rəsmiləri haqqında korrupsiya faktıyla biz dəfələrlə rastlaşmışıq. Erməni diasporasının pul kisəsindən asılı olan Avropalı rəsmilər uzun illər həm Azərbaycana, həm də Türkiyəyə qarşı çirkin kampaniya aparıb. Təsadüfi deyil ki, korrupsiyalaşmış qurumların sözü artıq eşidilmir və onlara etimad azalır”.
Müsahibimiz onu da əlavə edib ki, Avropadakı bəzi dairələrin və Okamponun Ermənistanda keçiriləcək parlament seçkilərinə qarışmaq niyyətinin arxasında da korrupsiya faktı dayanır:
“Keçmiş SSRİ dönəmindən başlayaraq xüsusi xidmət orqanları və imkanlı şəxslər Avropadakı bəzi rəsmiləri rüşvətlə ələ alıblar və proses bu gün də davam edir. Belə kampaniyalar seçkilər ərəfəsində daha da çoxalır. Ermənistanda gözlənilən parlament seçkilərinə müdaxilə təşəbbüsü də çirkin ənənənin hələ də yaşadığını göstərir”.
Surxay Atakişiyev, Biizm.Media
