Qlobal daşınmaz əmlak bazarı sürətlə dəyişməkdə davam edir və “1 milyon dollar” anlayışı əvvəlki məzmununu itirir.
Bizim.Media xəbər verir ki, “Knight Frank” şirkətinin yeni hesabatına əsasən, dünyanın iri şəhərlərində bu məbləğə əldə edilən yaşayış sahəsi getdikcə azalır.
Ən bahalı bazar olaraq Monako Knyazlığı əvvəlki kimi liderliyini qoruyur. Burada 1 milyon dollara cəmi təxminən 16 kvadratmetr mənzil almaq mümkündür ki, bu da əvvəlki illərlə müqayisədə daha azdır. Müqayisə üçün, Honkonq şəhərində eyni məbləğə təxminən 22,5 kvadratmetr, Nyu-York şəhərində isə 33,9 kvadratmetr sahə əldə etmək olar.
Araşdırmaya görə, premium seqmentdə daşınmaz əmlakın qiymətləri ümumi bazarla müqayisədə daha sürətlə bahalaşır.
Belə ki, 2025-ci ildə elit mənzillərin qiyməti 3,2% artdığı halda, ümumi bazarda bu göstərici 2,9% olub. Artımın əsas səbəbi varlı alıcıların sayının və onların beynəlxalq mobilliyinin yüksəlməsi ilə izah edilir.
Xüsusilə Yaxın Şərq regionunda ciddi bahalaşma qeydə alınıb.
Dubay şəhərində elit daşınmaz əmlakın qiyməti son bir ildə 25%, son beş ildə isə təxminən 200% artıb. Tokio şəhərində də son beş ildə 58%-lik artım müşahidə olunub. Bundan əlavə, Manila, Seul və Praqa kimi şəhərlərdə də əhəmiyyətli dinamika qeydə alınıb.
Ekspertlərin fikrincə, varlı şəxslər getdikcə daha çox müxtəlif ölkələrdə daşınmaz əmlak alır və bir məkana bağlı qalmırlar. Bu tendensiya ənənəvi mərkəzlərin rolunu dəyişir. Məsələn, London artıq daha çox müvəqqəti yaşayış şəhərinə çevrilir.
Ön plana isə vergi baxımından əlverişli və yüksək həyat səviyyəsi təklif edən şəhərlər çıxır. Perspektivli istiqamətlər sırasında Mumbay, Brisben, Mayami və Honkonq göstərilir.
1 milyon dolların “dəyəri” harada daha yüksəkdir
Şəhərlər arasında fərq kəskin olaraq qalır. Əgər Monako Knyazlığı kimi bazarda bu məbləğə cəmi 16 kvadratmetr almaq mümkündürsə, Mumbay şəhərində eyni pula təxminən 95,5 kvadratmetr sahə əldə etmək olur.
Bizim.Media
