Yetişmiş xurmanı seçmək üçün 4 qayda

Xurma alarkən onun şirin və yetişmiş olmasını müəyyənləşdirmək üçün bir neçə sadə əlamətə diqqət yetirmək lazımdır. Meyvənin görünüşü, rəngi və yumşaqlığı düzgün seçim etməyə kömək edə bilər.

Bizim.Media BB.LV saytına istinadla xəbər verir ki, ilk növbədə yumru və ya yastı formalı xurmalara üstünlük vermək tövsiyə olunur. Mənbəyə görə, belə meyvələrin ağızbüzüşdürücü dadı daha az ola bilər.

İkinci göstərici rəngdir: yetişmiş xurma adətən doymuş qırmızı-narıncı çalarda olur. Açıq narıncı rəng isə meyvənin tam yetişmədiyini göstərə bilər.

Xurmanın qabığında dairəvi şəkildə yerləşən nazik, quru zolaqlar da yetişmə əlaməti kimi qeyd olunur. Üçüncü qayda meyvənin toxuması ilə bağlıdır. Həddindən artıq bərk xurma yetişməmiş, əllə asanlıqla əzilən meyvə isə normadan artıq yetişmiş ola bilər. Ən uyğun seçim yüngül yumşaqlığı olan, formasını qoruyan xurmadır.

Dördüncü məqam meyvənin saplaq ətrafındakı yarpaqlarıdır. Keyfiyyətli xurmada bu yarpaqlar qurumuş olmalı, onların altında qəhvəyi çalar görünməlidir.

Bununla belə, xurmanın növü də onun rənginə və yumşaqlığına təsir etdiyindən bütün əlamətləri birlikdə qiymətləndirmək daha düzgündür. 

Bizim.Media