Zaman keçdikcə paltaryuyan maşında çoxlu çöküntü toplanır. Yuyucu vasitələrin, yumşaldıcıların, nəmin və çirkin qalıqları xoşagəlməz qoxulara səbəb ola, yumanın səmərəliliyini azalda və hətta cihazın xidmət müddətini qısalda bilər.
Bizim.Media xəbər verir ki, “El Cronista”nın yazdığına görə, paltaryuyan maşının təmizliyini qorumağa və geyimlərə qulluğu yaxşılaşdırmağa kömək edən sadə və ucuz məişət vasitəsi var. Söhbət ağ sirkədən gedir.
Bildirilir ki, ağ sirkənin tərkibində mineral çöküntüləri, yuyucu vasitələrin qalıqlarını və ərpi həll etməyə kömək edən sirkə turşusu var. Müntəzəm və orta miqdarda istifadə edildikdə, xoşagəlməz qoxuların aradan qaldırılmasına, paltaryuyan maşının barabanının təmizlənməsinə və yuyucu vasitə qalıqlarının yox edilməsinə kömək edir.
Nəşr həmçinin qeyd edir ki, ağ sirkə ərp yaranmasını azalda, şlanqları və cihazın daxili kanallarını təmiz saxlamağa kömək edə bilər. Sirkə paltaryuyan maşının təmizlənməsinə kömək etməklə yanaşı, geyimlərdə yuyucu vasitə qalıqlarının aradan qaldırılmasına və onların təbii şəkildə yumşalmasına da kömək edə bilər.
Nəşrdə ağ sirkənin üstünlüklərindən yararlanmağın iki əsas üsulu göstərilib. Mütəxəssislər hər bir-iki aydan bir dərin təmizləmə aparmağı tövsiyə edirlər.
Prosedur aşağıdakı addımlardan ibarətdir:
1. Bir və ya iki stəkan ağ sirkəni birbaşa barabana və ya yuyucu vasitə bölməsinə tökün.
2. Paltarsız şəkildə isti su ilə tam yuma proqramını işə salın.
3. Proqram başa çatdıqdan sonra daxili hissələrin tam quruması üçün qapını açıq saxlayın.
Nəşr vurğulayır ki, bu prosedur yığılıb qalmış qalıqları və xoşagəlməz qoxuları aradan qaldırmağa kömək edir. Həmçinin paltar yumşaldıcısı üçün nəzərdə tutulan bölməyə az miqdarda ağ sirkə tökmək olar. Bu, geyimlərdə yuyucu vasitə qalıqlarını aradan qaldırmağa və kəskin sirkə qoxusu buraxmamağa kömək edə bilər.
Ön yükləməli paltaryuyan maşını nə qədər tez-tez təmizləmək lazımdır?
Daha əvvəl təmizlik üzrə ekspert Jaklin Stayn ön yükləməli paltaryuyan maşının nə qədər tez-tez təmizlənməli olduğunu və ona necə düzgün qulluq edilməli olduğunu izah edib. O bildirib ki, bir çox insan paltaryuyan maşının daim su və yuyucu vasitələrdən istifadə etdiyi üçün öz-özünü təmizlədiyini düşünərək səhvə yol verir.
Staynin sözlərinə görə, həm üst, həm də ön yükləməli paltaryuyan maşınları təmizləmək lazımdır. Bununla belə, ön tərəfdən qapısı olan modellərdə kif yaranmasına daha çox rast gəlinir. Xüsusilə rezin sızdırmazlıq contasında su qala bildiyi üçün belə cihazlar daha müntəzəm qulluq tələb edir. (Demokrat.az)
Bizim.Media
