Toyuq əti ilə bağlı ŞAD XƏBƏR – 2027-ci ilin ortalarınadək...

Xəbər verdiyimiz kimi kənd təsərrüfatının inkişafı haqqında yeni dövlət proqramı hazırlanıb. Dövlət proqramının hədəfi 2030-cu ilə qədər əksər kənd təsərrüfatı məhsullarına olan ehtiyacın yerli istehsal hesabına ödənilməsidir. 

Maraqlıdır ki, hədəflər arasında quş ətinə olan tələbatın yaxın illərdə yerli istehsal hesabına ödənilməsi də var.

Bəs hazırda quşçuluqla bağlı vəziyyət necədir? Hədəfə nail olmaq üçün hansı addımlar atıla bilər?

Məsələ ilə bağlı Bizim.Media-ya açıqlama verən Azərbaycan Quş Əti, Yumurta İstehsalçıları və İxracatçıları Assosiasiyasının İdarə Heyətinin sədri Mürvət Həsənli bildirib ki, qəbulu nəzərdə tutulan dövlət proqramında quşçuluğun inkişafı ilə bağlı bir neçə məqam var:

“Həmin məqamlardan biri də quşçuluğun inkişafı üçün kənd təsərrüfatı təyinatlı torpaqların təyinatının dəyişdirilməsinin sürətləndirilməsidir. Bu olduqca vacib amildir. Bildiyimiz kimi, quşçuluq fabriklərinin istifadəsində xeyli torpaq sahəsi var. Amma həmin torpaqların kənd təsərrüfatı təyinatlı olması yeni istehsal sahələrinin tikintisinə imkan vermir. Əgər istifadədə olan torpaqların təyinatı qısa müddətdə dəyişdirilsə, o zaman yeni istehsal sahələri yaradılacaq. Bunun hesabına 2027-ci ilin ortalarına qədər ölkəmizin quş ətinə olan daxili ehtiyacı yerli istehsal hesabına ödəniləcək. Hətta quş ətinin ixracı üçün də imkanlar yaranacaq”.

Surxay Atakişiyev, Bizim.Media