“İstintaq ləng gedir, vəsatətlərim təmin edilmir”

Jurnalist Anar Niftəliyev həyat yoldaşı Elnarə Tofiqızının ölüm faktı ilə əlaqədar açılmış cinayət işi üzrə istintaqın ləng aparılmasından, verdiyi vəsatətlərin təmin edilməməsindən narazıdır. Bu barədə Bizimyol.info saytına məlumat verən A.Niftəliyev bildirdi ki, sonuncu dəfə dekabrın 31-də Nəsini rayon prokuroru ilə görüşüb. “Prokuror mənim vəsatətlərimin təmin ediləcəyi ilə bağlı vəd verdi və bildirdi ki, bayram günlərində də iş gedəcək, vəsatətlər təmin olunacaq və bu barədə mənə əlavə məlumat veriləcək. İstintagqın gedişinin obyektiv səbəblər üzündən ləngidiyini izah etməyə çalışdılar. Ancaq mən bildirdim ki, ləngimədə subyektiv səbəblər də var və bununla bağlı iradlarımı diqqətə çatdırdım. Bayram günləri artıq bitib və hələ də mənə heç bir məlumat verilməyib. Buna görə də, məcburam ki, bu gwn özüm əlaqə saxlayım” ”“ deyə A.Niftəliyev bildirdi. 

Jurnalistin sözlərinə görə, onun istintaqa vəsatətləri həkimlərin əməlində dələduzluq elementlərinin olması və bu istiqamətdə araşdırma aparılması ilə bağlıdır. “Əslində, həkimlərin əməllərində dələduzluq var. Belə ki, heç bir zəruri hal olmadan cərrahiyyə əməliyyatı etməyə inandırma, həmçinin əməliyyatın ağırlıq dərəcəsini “göstərmək” üçün zərurət olmadan “narkoz”dan istifadə ediblər. Səhiyyə Nazirliyinin ekspertləri də əməliyyat zamanı anestoloji üsuldan istifadə edilməsinə zərurətin olmadığını təsdiqləyiblər. Yəni bu əməliyyatın keçirilməsi üçün “narkoz”a heç bir ehtiyac olmadığı halda həkimlər əməliyyatın “ağırlığını” bizə nümayiş etdirərək, çox pul almaq məqsədi güdüblər. Vəsatətin biri bununla bağlı isi. Bundan başqa, məlum oldu əməliyyatın keçirilməsi üçün mənimlə danışılan məbləğin cəmi 10 faizini klinikaya ödəyiblər. Bir sözlə, hesab edirəm ki, həkim birləşərək dələduzluq əməllərinə yol veriblər və istintagqın bu məsələləri də araşdırmasını istəyirəm” ”“ deyən A.Niftəliyev vurğuladı ki, sentyabr ayından başlayaraq verdiyi ifadələrdə, ölkə başçısına, Baş Prokurora, Səhiyyə nazirinə müraciətlərində bütün bunlarla bağlı məlumat versə də, istintaq hələ də bu istiqamətdə istintaq hərətkəti aparmayıb. “İndi deyirlər ki, tibbi ekspertizanın nəticələrini gözləyirik, ona görə istintaq ləngiyir. Bunu başa düşdük, obyektiv səbəbdir, bəs verdiyim vəsatətlərin araşdırılmasına nə mane olur? Axı vəsatətlər vermək və məsələnin araşdırılmasında zərərçəkmiş qismində iştirak etmək mənim hüququmdir. Niyə mənim istintaqa rəsmi şəkildə yazılı verdiyim vəsatətə əsasən, bir dəfə həkimi dindirməməsiniz, klinikanın baş həkimindən soruşmamısınız ki, sənə bu əməliyyata görə, nə qədər pul veriblər?”

Xatırladaq ki, Bakı Slavyan Universitetinin dekanı, tənqidçi Elnarə Tofiqqızı sentyabrın 20-də Nəsimi rayonunda yerləşən “Medi Sina” Tibb Mərkəzində süd vəzi kanalının əməliyyatı zamanı vəfat edib. Hadisədən dərhal sonra E.Tofiqqızının meyiti müayinə olunmaq üçün Məhkəmə-Tibbi Ekspertizası və komisyon müayinədən keçirilib. Keçirilən ekspertizaların ilkin rəyinə əsasən, E.Tofiqqızının asfiksiyadan (nəfəs çatışmazlığından) öldüyü məlum olub. Baş verən hadisə ilə bağlı E.Tofiqqızının əməliyyatında iştirak edən həkim personalı prokurorluqda ifadə verib. E.Tofiqqızının həyat yoldaşı, jurnalist Anar Niftəliyevin də ifadəsi alınıb. 

 Sentyabrın 25-də Nəsimi Rayon Prokurorluğunda faktla bağlı Cinayət Məcəlləsinin 314.2 (səhlənkarlıq - ehtiyatsızlıqdan zərərçəkmiş şəxsin ölümünə səbəb olduqda) maddəsi ilə cinayət işi açılıb. 

Dekabrın 25-də Səhiyyə Nazirliyinin tibbi ekspertlərinin rəyi açıqlanıb. İstintaq işinə əlavə olunan bu rəydə E.Tofiqqızının “Medi Sina” klinikasında əməliyyatdan əvvəl müayinələrin aparılmasında, xəstənin cərrahiyyə əməliyyatına hazırlanmasında, anesteziya metodunun seçilməsində və onun adına tibbi sənədlərin tərtib edilməsində tibb işçiləri tərəfindən nöqsanlara yol verildiyi vurğulanıb.