Gürcüstanın NATO-ya inteqrasiyası Rusiyanın Qafqazdakı təsirini azalda bilərmi?

İyulun 8-9-da Varşavada NATO-nun növbəti sammiti fəaliyyətə başlayacaq. Sammitdə bir sıra məsələrlə yanaşı Gürcüstanın NATO-ya inteqrasiyası ilə bağlı da müzairələrin aparılması nəzərdə tutulur.

Maraqlıdır, Gürcüstanın NATO-ya inteqrasiyasi Rusiyanın Cənubi Qafqazadakı nüfuz və təsirini azalda,onun aktivliyi yolunda əngələ çevrilə bilərmi?

Məsələ ilə bağlı Moderator.az-a açıqlama verən "Borçalı" Cəmiyyətinin sədri Zəlimxan Məmmədli hesab edir ki, yalnız Gürcüstanın deyil, Azərbaycanın da təhlükəsizliyinin qarantı NATO-ya inteqrasiyadır:

"Gürcüstan Saakaşvili dönəmində ən doğru, həm də cəsarətli addım ataraq dünyanın əhəmiyyətli hissəsinin dəstəyini qazandı. Saakaşvili təcavüzkarın, aqressorun adını açıq söylədi. Rusiyanın, Putin rejiminin əsl siması bəlli oldu. Rusiya ilə Gürcüstan münasibətləri daha da gərginləşsə də,  Abxaziya və Cənubi Osetiya separatçı rejimləri Rusiyanın himayəsinə alınsa da, Gürcüstan dünyanın əhəmiyyətli və mütərəqqi, güclü hissəsinin - Avropa və ABŞ-ın dəstəyini qazandı.Gürcüstan artık demokratik dövlət kimi tanınıq və açıq formada Avrointeqrasiya yolunu tutub.

Rusiya Gürcüstanın timsalında qonşusunda cazibə qüvvəsi artıq olan demokratik ölkənin olmasını qətiyyətlə istəmir. Çünki bu imperiya ambisiyasının iflası olmaqla indiki Putin rejiminin iflasıdır. Demək olar ki, artıq Gürcüstanın NATO-ya inteqrasiyası geriyədönməz prosesdir. Varşavada Gürcüstanın NATO-ya tam üzvlüyü olmasa da, Gürcüstanı dəstəkləyən mövqenin ifadə olunmasını gözləmək olar. Dəfələrlə deyildiyi kimi, NATO-ya tam üzvlük üçün Gürcüstan bir sıra öhdəlikləri yerinə yetirməlidir. Rusiya bütün hallarda aqressivlik nümayiş etdirəcək.

Demokratik olmayan Putin rejimi təəssüf ki, hələ də qonşu dövlətlər üçün qorxu mənbəyi olaraq qalmaqdadır. Həm Gürcüstanın, həm də Azərbaycanın milli təhlükəsizliyi və qarantlı müstəqilliyi alternativsiz olaraq NATO-ya inteqrasiyadan keçir. Fikrimcə, Azərbaycan-Gürcüstan- Türkiyə ittifaqı regional və strateji təhlükəsizlik məsələləri ilə bağlı qarşılıqlı inteqrasiya xəttinin möhkəmləndirilməsi də təhlükələrdən bu anda sığortalanmağın tək yollarından biridir. Hamı anlamalıdır ki, təhlükələrdən sığortalanmaq cəsarət tələb etməklə müəyyən itkilərlə üz-üzə olmaq deməkdir. Psixoloji olaraq buna hamımız hazırlanmalı və əbədi istiqlal formuluna həyata keçirməliyik".

Seymur Əliyev